Oʻzbekiston va Xitoy soʻnggi yillarda elektrotexnika va yuqori texnologiyalar sohasida hamkorlikni izchil rivojlantirib kelmoqda. Ayniqsa, displey texnologiyalari, elektron komponentlar ishlab chiqarish va texnologik transfer yoʻnalishlari ikki mamlakat sanoati oʻrtasidagi oʻzaro aloqalarni mustahkamlashda muhim oʻrin tutadi.

Bu yoʻnalishdagi istiqbolli hamkorlikning navbatdagi qadami sifatida Xitoyning Shanxay shahrida oʻtayotgan “Shanghai International Display Innovation Expo - 2025” xalqaro koʻrgazmasi alohida ahamiyat kasb etadi.

Ushbu nufuzli tadbirda dunyo displey texnologiyalari sohasidagi ilgʻor ishlanmalar, zamonaviy yechimlar va hamkorlik imkoniyatlari namoyish etilmoqda. Koʻrgazmada Oʻzbekistondan “Oʻzeltexsanoat” uyushmasi vakillari ham faol ishtirok etmoqda.

Koʻrgazma doirasida uyushma raisi Mirziyod Yunusov boshchiligidagi ishchi guruh Xitoyning optoelektronika sanoati vakillari bilan uchrashuvlar oʻtkazdi. Xususan, KODA - Xitoy optoelektronikchilar uyushmasi rahbariyati bilan muloqotda oʻzaro hamkorlik yoʻnalishlari muhokama qilinib, Oʻzbekistonda displey panellarini ishlab chiqarish boʻyicha takliflar ilgari surildi.

Shuningdek, delegatsiya displey va elektron komponentlar ishlab chiqarish boʻyicha yetakchi kompaniyalar boʻlgan TCL va HKC bilan birlamchi muzokaralar olib bordi. Suhbat chogʻida potensial investitsiya loyihalari, texnologik transfer va qoʻshma ishlab chiqarish masalalari yuzasidan fikr almashildi.

Uyushma axborot xizmatining qayd etishicha, mazkur tashrif natijasida elektrotexnika sanoatida yuqori qoʻshilgan qiymatga ega mahsulotlar ishlab chiqarishni yoʻlga qoʻyish, yangi ish oʻrinlarini yaratish va milliy eksport salohiyatini oshirishga qaratilgan istiqbolli tashabbuslar amalga oshirilishi koʻzda tutilgan.

#displey

Oʻzbekiston va Xitoy displey panellarini ishlab chiqarish boʻyicha hamkorlikni yoʻlga qoʻymoqchi