Bu haqda Fargʻona viloyati sudlari axborot xizmati maʼlum qildi.

Qayd etilishicha, 2026 yil 20 yanvar kuni Margʻilon shahar sudida avval sudlangan, muxbir sifatida faoliyat yuritgan Elyor Tojiboyevga nisbatan jinoyat ishi koʻrib chiqilib, unga hukm oʻqilgan.

Sud qaroriga koʻra, Elyor Tojiboyev Jinoyat kodeksining olti moddasi boʻyicha aybdor deb topildi. Jumladan, u:

tuhmat qilish,
haqoratlash,
tovlamachilik,
hokimiyat vakiliga yoki fuqaroviy burchini bajarayotgan shaxsga qarshilik koʻrsatish,
yolgʻon axborot tarqatish,
shuningdek, hujjatlar, shtamplar, muhrlar, blankalar hamda avtotransport vositalari davlat raqam belgilari bilan bogʻliq jinoyatlarni sodir etganlikda aybli deb topildi.

Sud tomonidan unga nisbatan Jinoyat kodeksining 59 va 61-moddalariga asosan 3 yil 10 oylik jazo, shuningdek, 60 va 61-moddalariga muvofiq ilgari muddatidan oldin shartli ozod qilingani bekor qilinib, jami 4 yil muddatga ozodlikdan mahrum qilish jazosi tayinlandi.

Elyor Tojiboyev tayinlangan jazoni qattiq tartibli koloniyada oʻtashi belgilandi.

Maʼlumot uchun, ushbu shaxs 2021 yilda ham Jinoyat kodeksining tergov yoki sud ishlariga aralashishni nazarda tutuvchi moddasi bilan aybdor deb topilib, 3 yilga ozodlikdan mahrum qilingan. U oʻsha vaqtda «Effect.uz» saytining sobiq, «Taftish.uz» saytining esa amaldagi muxbiri boʻlgan.

#elyor tojiboyev

«Antikorrupsiya» sayti muxbiri 4 yilga ozodlikdan mahrum etildi