Bunga AQSh Adliya vazirligi tomonidan “Epshteyn fayllari”ning ommaga oshkor qilinishi sabab boʻldi.

Maʼlum qilinishicha, 2 fevral kuni jami 3,5 milliondan ortiq hujjat eʼlon qilingan. Ular orasida 3 milliondan ziyod yangi hujjat, 2 mingta videoyozuv va taxminan 180 mingta tasvir materiallari mavjud.

Epshteyn kim boʻlgan?

Jeffri Epshteyn 1953 yil AQShda tugʻilgan. U faoliyatini maktabda oʻqituvchi sifatida boshlagan, biroq diplomsiz ishlagani sabab qisqa vaqt ichida ishdan boʻshatilgan. Keyinchalik u “Bear Stearns” investitsiya kompaniyasida turli lavozimlarda ishlab, moliya sohasida tajriba orttirgan.

Tergov materiallariga koʻra, Epshteyn 1000 dan ortiq voyaga yetmagan qizlar va yosh ayollarni turli usullar bilan oʻz taʼsiri ostiga olgan. Ular Epshteyn va u bilan yaqin aloqada boʻlgan ayrim nufuzli shaxslar tomonidan jinsiy ekspluatatsiya va zoʻravonlikka uchragani aytilmoqda.

Ilk ayblovlar va yengil jazo

2005 yilda Florida shtati Palm-Bich shahrida bir ota-ona politsiyaga murojaat qilib, Epshteyn 14 yoshli qizni jinsiy zoʻravonlikka uchratganini maʼlum qiladi. Shundan soʻng boshlangan tergov davomida kamida 36 nafar voyaga yetmagan qiz jabr koʻrgani aniqlangan. Ayrim qurbonlar 14 yoshda boʻlgan.

2008 yilda Epshteyn sudda aybini tan olgan. Biroq AQSh Adliya vazirligining oʻsha paytdagi yuqori lavozimli amaldori Aleksandr Akosta bilan tuzilgan kelishuv sabab u atigi 13 oy qamoq jazosini oʻtagan va muddatidan oldin ozodlikka chiqqan. Bu holat jamoatchilikda katta eʼtirozlarga sabab boʻlgan.

Qayta hibs va bahsli oʻlim

2019 yil 6 iyul kuni Epshteyn Florida va Nyu-York shtatlarida voyaga yetmaganlarni jinsiy savdoga majburlash boʻyicha federal ayblovlar bilan yana hibsga olinadi. Shu yilning 10 avgust kuni esa u qamoqxonadagi kamerasida vafot etadi.

Nyu-York shahri bosh sud-tibbiy eksperti Barbara Sampson Epshteyn osish orqali oʻz joniga qasd qilganini maʼlum qildi. Biroq ushbu holat jamoatchilikda keskin bahslarga sabab boʻldi. Qayd etilishicha, Epshteyn vafot etgan paytda ikki qoʻriqchi uxlab qolgan, kameralarda esa texnik nosozlik boʻlgan. Sud-tibbiy patolog Maykl Baden rasmiy xulosaga eʼtiroz bildirgan.

Epshteyn vafoti sababli 2019 yil 29 avgust kuni sud uning barcha jinoiy ayblovlarini bekor qildi.

Epshteyn kimlar bilan aloqada boʻlgan?

Reuters nashri oshkor etilgan hujjatlarga tayanib, Epsteyn bilan aloqada boʻlgan ayrim mashhur shaxslar nomini eʼlon qildi.

Donald Tramp
1990–2000 yillar oraligʻida Epshteyn bilan muloqotda boʻlgan. Hujjatlarda Tramp ishtirok etgan suratlar va yozma materiallar tilga olinadi. Tramp esa Epshteyn jinoyatlaridan bexabar boʻlganini va u bilan aloqalarini barvaqt uzganini bildirgan.

Bill Klinton
AQShning sobiq prezidenti lavozimdan ketganidan keyin Epshteyn bilan muloqot qilgani, uning samolyotida bir necha bor uchgani aytilmoqda. Klinton barcha ayblovlarni rad etgan.

Ilon Mask
Hujjatlarda Mask va Epshteyn oʻrtasida ayrim yozishmalar mavjud. Mask Epshteyn bilan kam muloqotda boʻlganini va uning oroliga borish takliflarini rad etganini aytgan.

Bill Geyts
Hujjatlarga koʻra, Epshteyn qamoqdan chiqqanidan keyin Geyts bilan bir necha marta xayriya masalalari yuzasidan uchrashuvlar boʻlgan. Geyts bu aloqa xato boʻlganini tan olgan.

Shuningdek, hujjatlarda Melaniya Tramp, Piter Mandelson, Larri Sammers kabi boshqa taniqli shaxslar nomi ham uchraydi.

“Epshteyn fayllari”ning oshkor etilishi jahon elitasi, jinoyat va javobgarlik masalalari atrofidagi bahslarni yanada kuchaytirdi. Hozircha koʻplab savollar ochiq qolmoqda, tergovga oid yangi maʼlumotlar esa jamoatchilik diqqat markazida turibdi.

#epshteyn

Jeffri Epshteyn ishi: oshkor etilgan fayllar va elita bilan aloqalar