Tashkilot geolokatsiya orqali tasdiqlangan bir nechta surat va videolarni tahlil qildi. Ular turar-joy mahallasi ustida havoda portlatilgan fosfor snaryadlari hamda uylar va avtomobillarda yongʻinlar kelib chiqqanini koʻrsatdi.

Oq fosfor havo bilan aloqaga kirishi bilan darhol yonib ketadigan juda xavfli kimyoviy modda hisoblanadi. U artilleriya snaryadlari, bombalar va raketalar tarkibida qoʻllanilib, portlash paytida yuqori harorat va qalin oq tutun hosil qiladi.

Bu modda tarqalganda atrofdagi uylar, avtomobillar, oʻrmonlar va qishloq xoʻjaligi maydonlarida tezda yongʻin kelib chiqishi mumkin. Oq fosfor inson terisiga tegsa, u katta kuyishlarga va suyakkacha yetadigan ogʻir jarohatlarga sabab boʻladi.

Shuningdek, uning tutuni nafas olish tizimiga zarar yetkazib, zaharlanish, koʻz va oʻpka shikastlanishiga olib kelishi mumkin. Bunday jarohatlar koʻpincha uzoq muddatli azob va doimiy tibbiy muolajalarni talab qiladi.

Human Rights Watch tahliliga koʻra, Yohmorda qoʻllangan oq fosforli snaryadlar aholi zich yashaydigan hudud ustida havoda portlatilgan. Bunday usul 125–250 metr radiusda yonuvchi fosfor boʻlaklarini tarqatadi. Xalqaro gumanitar huquqqa koʻra, aholi yashaydigan joylarda bunday qurollardan foydalanish ehtimoliy zararni oldini olish talablariga zid hisoblanadi.

Huquq himoyachilari xalqaro hamjamiyatni mazkur holatni tekshirishga chaqirmoqda. Tashkilot ayrim davlatlar, jumladan AQSh, Britaniya va Germaniyani Isroilga harbiy yordam va qurol yetkazib berishni vaqtincha toʻxtatish masalasini koʻrib chiqishga daʼvat qildi.

Shuningdek, fuqarolarni muhofaza qilish uchun yonuvchi qurollar boʻyicha xalqaro huquqiy normalarni kuchaytirish zarurligi taʼkidlandi.

#fosforli qurol

Isroil fosforli qurol ishlatgani maʼlum boʻldi