Tracker krossoveri hozirgi avlodi ilk bor 2019 yili Xitoyda taqdim etilgan edi. Keyinchalik ushbu model Braziliya, Argentina va Oʻzbekistonda ham ishlab chiqarish yoʻlga qoʻyildi.

2022 yilda Xitoyda sport koʻrinishdagi RS versiyasi namoyish etilgan boʻlib, uning saloniga yangilik kiritilgan, biroq tashqi koʻrinishi deyarli oʻzgarmagan edi.

Xitoy bozorida Tracker kutilgan muvaffaiyatni qoʻlga kirita olmagan va ushbu model yigʻilishi toʻxtatilgani xabar qilingan. Ammo Lotin Amerikasida, ayniqsa Braziliyada, ushbu krossover katta talabga ega.

General Motors’ning Braziliyadagi boʻlimi yangilangan Tracker’ning ommaviy ishlab chiqarilishini boshlaganini maʼlum qildi va zavoddagi birinchi modellar suratlarini eʼlon qildi. Yangi Tracker ikki qavatli yorugʻlik tizimi bilan jihozlangan: yuqorida yorugʻlik diodli yulduzsimon chiroqlar, pastda esa asosiy farlar joylashgan. Shuningdek, yangi bamper va radiator panjarasida yangiliklar bor.

Salon ham yangilangan boʻlib, multimedia plansheti va raqamli panel birlashtirilgan. Yangi «iqlim» nazorati displey va ikkita aylanuvchi tugma bilan boshqariladi.

Texnik jihatlar haqida hali rasmiy maʼlumot berilmadi. Ammo 2023 yil oxirida Tracker’ning Braziliya versiyasidagi motorlari modernizatsiya qilingan edi. Benzin va etanolda ishlaydigan 1.0 va 1.2 turbomotorlar shundayligicha saqlanishi kutilmoqda. Ular mos ravishda 117/121 va 139/141 ot kuchiga ega boʻlib, 6 pogʻonali avtomat qutisi bilan jihozlangan.

Yangilangan Tracker’ning toʻliq taqdimoti yaqin haftalarda oʻtkazilishi rejalashtirilgan.

#gm

Chevrolet Tracker’ning yangilangan modeli namoyish qilindi