Yangi tartiblarga koʻra, Umra amallarini bajarish uchun soʻnggi sana – 2026 yil 18 aprel etib belgilangan.

Har yili Makka va Madina shaharlariga millionlab ziyoratchilar tashrif buyuradi. Ammo Haj mavsumi yaqinlashgan sari Saudiya hukumati muqaddas shaharlarni katta hajmdagi ziyoratchilarni qabul qilishga tayyorlash maqsadida Umra vizalarini vaqtincha toʻxtatadi.

Rasmiy maʼlumotlarga koʻra, Umra vizasiga ariza berishning soʻnggi kuni – joriy yil 19 mart, Saudiya Arabistoniga kirishning soʻnggi kuni – 2 aprel, mamlakatni tark etishning soʻnggi kuni esa – 18 aprel etib belgilangan.

Belgilangan muddatlar oʻzgartirilmaydi. Ziyoratchilar Umra amallarini oʻz vaqtida yakunlab, Haram hududini tark etishlari shart.

Mutaxassislar taʼkidlashicha, Umra ziyoratining toʻxtatilishi logistika va xavfsizlik nuqtai nazaridan zarur. Haj paytida ikki milliondan ortiq ziyoratchi kelishi kutilmoqda. Shu bois xavfsizlik choralari kuchaytiriladi, tibbiy xizmatlar kengaytiriladi hamda mehmonxonalar va transport tizimi Haj ziyoratchilari uchun qayta tashkil etiladi.

Bu tartib muqaddas masjidlarda ortiqcha tirbandlikning oldini olishga ham xizmat qiladi.

Cheklovlar Haj oldidan Umra rejalashtirgan ziyoratchilar, xalqaro sayohat agentliklari, Makka va Madinadagi mehmonxona va transport sohasi vakillari hamda mahalliy fuqarolar va xorijiy rezidentlarga taʼsir koʻrsatadi.

Maʼlumotlarga koʻra, Haj mavsumi yakunlangach, taxminan 2026 yil 11 iyun atrofida Umra qayta yoʻlga qoʻyilishi kutilmoqda.

#haj va umra

«Umra» ziyoratiga borishga vaqtinchalik cheklov eʼlon qilindi