Bu holatlar yuzasidan Davlat mehnat inspeksiyasi rasmiy munosabat bildirdi.

Taʼlim sohasida bahsli vaziyat

Maʼlumotlarga koʻra, inspeksiyaga kelib tushayotgan murojaatlarning katta qismi til sertifikatiga ega boʻlmagan oʻqituvchilar bilan bogʻliq. Ayrim taʼlim muassasalari rahbariyati mazkur asosda mehnat munosabatlarini toʻxtatishga urinib, qonun talablarini chetlab oʻtayotgani aytilmoqda.

Davlat mehnat inspeksiyasi bunday harakatlar mehnat qonunchiligiga zid ekanini taʼkidlab, har bir holat alohida oʻrganilib, aybdorlarga nisbatan belgilangan tartibda chora koʻrilishini bildirdi.

Inspeksiya, shuningdek, oʻz huquqlari buzilgan deb hisoblagan oʻqituvchilarni rasmiy murojaat qilishga chaqirdi.

Sertifikat talabi qayerdan kelgan?

Eslatib oʻtamiz, xorijiy til oʻqituvchilari uchun kamida B2 darajadagi milliy yoki xalqaro til sertifikatiga ega boʻlish talabi 2021 yilda qabul qilingan Vazirlar Mahkamasi qarori asosida joriy etilgan.

Dastlab ushbu talab 2024 yilga qadar bajarilishi kerak edi. Biroq oʻqituvchilarning barchasi belgilangan muddatda sertifikat ololmagani sababli, uni joriy etish bir necha bor kechiktirildi.

Oxirgi qarorga muvofiq, sertifikatga ega boʻlmagan oʻqituvchilarga 2026 yil 1 yanvarga qadar faoliyat yuritishga ruxsat berilgan.

Vazirlik va kasaba uyushmalari pozitsiyasi

2025 yil yozida Oʻzbekiston taʼlim va fan xodimlari kasaba uyushmalari respublika kengashi tegishli vazirlikka murojaat qilib, sertifikatga ega boʻlmagan xorijiy til oʻqituvchilarini ishdan boʻshatmaslikni soʻragan.

Maktabgacha va maktab taʼlimi vazirligi esa oʻz javobida taʼlim muassasalariga bunday oʻqituvchilar bilan mehnat shartnomalarini bekor qilish boʻyicha rasmiy koʻrsatma berilmaganini maʼlum qilgan.

#ishsizlik

Xorijiy til oʻqituvchilari nega ish joyini yoʻqotyapti?