Tadbirning maqsadi Oʻzbekistonning sayyohlik imkoniyatlarini Pokiston jamoatchiligi orasida keng targʻib etish va mamlakatimizga xorijiy sayyohlar oqimini oshirishdir.

Anjumanda “BMG Group” kompaniyasi raisi Muhammad Zubair Motivala, Pokiston sayyohlik agentliklari uyushmasi raisining oʻrinbosari Muhammad Ilyas, “Oʻzbekiston–MDH savdo markazi” rahbari Suhail Moten, Sind Turizm korporatsiyasi vakillari, turizm operatorlari, mahalliy OAV va vatandoshlar ishtirok etdi.

Elchixona vakili oʻz nutqida ikki xalqni bogʻlab turgan umumiy tarixiy va madaniy rishtalar, oʻxshash urf-odatlar va qadriyatlar haqida soʻz yuritdi. Shuningdek, Oʻzbekistonda ziyorat, madaniy, tibbiy, ekologik va ishbilarmonlik turizmini rivojlantirish yoʻnalishida amalga oshirilayotgan islohotlar va qulay shart-sharoitlar haqida maʼlumot berdi.

Qatnashchilarga joriy yilning 30 oktabridan 13 noyabrigacha Samarqandda YuNESKO Bosh konferensiyasining 43-sessiyasi oʻtkazilishi haqida ham maʼlum qilindi. Bu, oʻz navbatida, Oʻzbekistonning xalqaro nufuzi ortib borayotganidan dalolat sifatida qayd etildi.

Shuningdek, “Uzbekistan Airways” kompaniyasi hozirda Islomobod va Lahor shaharlariga muntazam reyslar amalga oshirayotgani, yaqin vaqtda Karachiga toʻgʻridan-toʻgʻri parvozlar yoʻlga qoʻyilishi maʼlum qilindi

Muhammad Motivala Oʻzbekistondagi turizm sohasidagi islohotlarni yuqori baholab, mamlakatning barqaror iqtisodiy muhiti va infratuzilmasi pokistonlik investorlar uchun katta imkoniyatlar ochayotganini taʼkidladi. U Karachi va Oʻzbekiston oʻrtasida toʻgʻridan-toʻgʻri aviaqatnovlarni yoʻlga qoʻyish zarurligini ham qayd etdi.

Pokiston sayyohlik uyushmasi vakili Muhammad Ilyas Oʻzbekistonning ziyorat va islom sivilizatsiyasi turizmi sohasidagi ulkan salohiyatini eʼtirof etib, ikki mamlakat oʻrtasida maxsus ziyorat va madaniy sayohat dasturlarini ishlab chiqish boʻyicha hamkorlikka tayyorligini bildirdi.

Suhail Moten Oʻzbekiston va Pokistonni bogʻlab turgan Ipak yoʻli tarixi haqida soʻzlab, turizmni ikki xalq oʻrtasidagi doʻstlik va ishonchni mustahkamlovchi muhim vosita sifatida taʼkidladi.

Tadbir doirasida Oʻzbekistonning boy tarixiy va madaniy merosi, turistik manzilgohlari hamda zamonaviy infratuzilmasi haqida taqdimotlar va videoroliklar namoyish etildi.

#karachi

“Uzbekistan Airways” Karachiga toʻgʻridan-toʻgʻri parvozlarni yoʻlga qoʻyadi