2025 yil 17 iyul kuni Turizm qoʻmitasida “Kouzon Corporation” kompaniyasi bosh direktori Zoran Kochoski bilan uchrashuv oʻtkazildi.

Uchrashuvda Oʻzbekiston fuqarolarini, xususan turizm sohasida taʼlim olayotgan talabalar va turizm texnikumlari oʻquvchilarini xalqaro kruiz laynerlarida qonuniy mehnat faoliyatiga jalb etish borasida hamkorlikni yoʻlga qoʻyish imkoniyatlari muhokama qilindi.

Zoran Kochoski 16 iyul kuni Samarqand shahriga tashrifi davomida “Ipak yoʻli” turizm va madaniy meros xalqaro universiteti hamda Xalqaro turizm akademiyasining Samarqand kampusiga tashrif buyurganini va ushbu taʼlim muassasalarida yaratilgan shart-sharoitlar xalqaro standartlarga javob berishini alohida qayd etdi. Shu bois, u mazkur muassasalar bitiruvchilarini kruiz sanoatiga jalb qilishdan manfaatdor ekanini bildirdi.

Kompaniya rahbarining taʼkidlashicha, faqatgina talabalar emas, balki ingliz tilini biladigan 21-45 yoshdagi boshqa Oʻzbekiston fuqarolarini ham ushbu sohaga jalb qilish va ularning malakasini oshirish imkoniyatlari mavjud.

Uchrashuv chogʻida Z. Kochoski “Kouzon Corporation” kompaniyasi Migratsiya agentligi bilan hamkorlikda tasdiqlanadigan “yoʻl xaritasi” doirasida Oʻzbekiston fuqarolari vizalarni rasmiylashtirish, nomzodlarni saralash va tayyorlash, shuningdek, ularni kruiz laynerlariga ishga joylashtirish jarayonlarida amaliy yordam koʻrsatishga tayyor ekanligini maʼlum qildi.

Muzokaralar yakunida Z. Kochoski joriy yilning avgust yoki sentabr oylarida Turkiyadagi kruiz laynerlarida koʻrsatilayotgan xizmatlar, ish sharoitlari va kadrlar tayyorlash talablari bilan yaqindan tanishish maqsadida turizm sohasida kadrlar tayyorlovchi taʼlim muassasalari hamda sayohat agentliklari vakillari uchun tashrif tashkil etishni taklif qildi.

#kruiz

Oʻzbekiston fuqarolarini kruiz sanoatida ish bilan taʼminlash masalalari muhokama qilindi