Xalqaro huquqni ochiq inkor etish

Solovyov oʻz chiqishlarida xalqaro huquqiy meʼyorlarga rioya qilish niyati yoʻqligini yashirmadi. Uning taʼkidlashicha, milliy xavfsizlik manfaatlari har qanday xalqaro qoidalardan ustun turadi.

«Biz tushuntirishimiz kerak: oʻyinlar tugadi. Xalqaro huquqqa ham, xalqaro tartibga ham tupurdik», — dedi u.

Shuningdek, u Ukrainada boshlangan harbiy harakatlar boshqa mintaqalarda ham takrorlanishi mumkinligini ochiq tan oldi:

«Agar milliy xavfsizligimiz sabab Ukraina hududida maxsus harbiy operatsiyani boshlagan boʻlsak, aynan shu mulohazalardan kelib chiqib, taʼsir doiramizning boshqa nuqtalarda ham nega uni boshlamasligimiz kerak?» — dedi Solovyov.

Geosiyosiy ustuvorliklar va mintaqaviy tahdidlar

Kreml propagandisti Rossiya uchun «yaqin xorij» — avvalo Armaniston va Markaziy Osiyo davlatlari Suriya yoki Venesuela kabi uzoq hududlardan ancha muhim ekanini taʼkidladi. Uning fikricha, ushbu mintaqalarda taʼsirni yoʻqotish Rossiya uchun jiddiy strategik oqibatlarga olib kelishi mumkin.

«Venesueladagi voqealardan koʻra Armanistonda yuz berayotgan jarayonlar biz uchun ancha ogʻriqli. Armanistonni yoʻqotish — ulkan muammo», — dedi u.

Markaziy Osiyo haqida esa quyidagicha baho berdi:

«Osiyodagi, Oʻrta Osiyodagi, ular aytganidek, Markaziy Osiyodagi muammolar biz uchun katta falokatka aylanishi mumkin. Shu sababli maqsad va vazifalarimizni aniq belgilab olishimiz shart», — deya taʼkidladi Solovyov.

Zoʻravonlikka ochiq daʼvatlar

Solovyov Rossiyaning Ukrainadagi harakatlari «yetarlicha shafqatsiz emas» degan fikrni ilgari surib, boshqa hududlarda yanada «qonunsiz va shafqatsiz» usullarni qoʻllashni taklif qildi. U Rossiya manfaatlari doirasiga kiruvchi mamlakatlarda «har qanday hokimiyat boʻlishi mumkin, faqat antirossiyachi boʻlmasligi kerak», deya Armaniston va Gruziyani misol sifatida tilga oldi.

Shuningdek, u zarurat tugʻilsa, Venesuela prezidenti Nikolas Maduroni oʻgʻrilashga oʻxshash maxsus operatsiyani ham amalga oshirish mumkinligini aytdi. Solovyov bu fikrlarida Donald Trampning Grenlandiya va Venesuela haqidagi bahsli ritorikasiga ham ishora qildi.

Vladimir Solovyovning bayonotlari Rossiyaning oʻz «taʼsir doirasi» deb bilgan hududlarda, jumladan Markaziy Osiyo va Armanistonda harbiy aralashuv ehtimolini istisno qilmayotganini koʻrsatadi. Bu esa xalqaro huquqni ochiq rad etish va milliy xavfsizlikni bahona qilib, qoʻshni davlatlar suverenitetiga tahdid solish demakdir.

#markaziy osiyo

Xalqaro huquqqa ham, xalqaro tartibga ham tupurdik - Vladimir Solovyov nima demoqchi?