Roʻyxatdan siyosat arboblari, biznes-vumenlar, olimlar hamda zamonaviy dunyoning iqtisodiy va siyosiy kun tartibini belgilayotgan madaniy ikonalar oʻrin olgan.

Baholash ayollarning taʼsir kuchi, boyligi, ommaviy tanilishi va oʻz sohasidagi ahamiyati asosida amalga oshirilgan. Quyida roʻyxatning ilk oʻntaligi keltirilgan.

1. Ursula fon der Lyayen — Yevropa Komissiyasi prezidenti

2019 yil iyulidan beri Ursula fon der Lyayen Yevropa Komissiyasiga rahbarlik qilib kelmoqda. Ushbu ijro organi 450 milliondan ortiq yevropaliklar hayotiga taʼsir koʻrsatuvchi qonunchilikni ishlab chiqadi. Fon der Lyayen mazkur lavozimni egallagan ilk ayol hisoblanadi.

2005–2019 yillarda u Germaniya kansleri Angela Merkel hukumat tarkibida ishlagan, soʻnggi olti yilda esa Germaniya mudofaa vaziri boʻlib faoliyat yuritgan. 2024 yilda ikkinchi muddatga qayta saylangan fon der Lyayen Yevropa demokratik qadriyatlarini mustahkamlashni asosiy ustuvor vazifa sifatida belgiladi.

2. Kristin Lagard — Yevropa Markaziy banki prezidenti

Kristin Lagard 2019 yil 1 noyabrdan beri Yevropa Markaziy bankiga rahbarlik qilib keladi va bu lavozimdagi ilk ayoldir. U yuqori inflyatsiya sharoitida yevrozona iqtisodiy barqarorligini taʼminlash uchun javobgar hisoblanadi.

2011–2019 yillarda Lagard Xalqaro valyuta jamgʻarmasi direktori boʻlgan. U 2008 yilgi moliyaviy inqirozni tahlil qilar ekan, qaror qabul qilishda “guruh tafakkuri”ning salbiy taʼsirini tanqid qilgan va gender tengligini qoʻllab-quvvatlab keladi.

3. Sanae Takaiti — Yaponiya Bosh vaziri

2025 yil oktabrida Sanae Takaiti Yaponiya tarixidagi ilk ayol bosh vazir sifatida lavozimga kirishdi. U 1993 yildan beri Liberal-demokratik partiyada turli yuqori lavozimlarda ishlab kelgan.

Hozirda Takaiti inflyatsiya va ish haqi oʻsishi sekinlashgan sharoitda dunyoning toʻrtinchi yirik iqtisodiyoti boʻlgan Yaponiyani boshqarish masʼuliyatini oʻz zimmasiga olgan.

4. Djordjiya Meloni — Italiya Bosh vaziri

Djordjiya Meloni 2022 yil 22 oktabrda Italiya tarixida bosh vazir lavozimini egallagan ilk ayol boʻldi. U shuningdek, 2012 yilda tashkil etilgan oʻng qanotdagi “Italiya birodarlari” partiyasi yetakchisi hisoblanadi.

Meloni Yevropa millatchilik harakatlarining eng yorqin vakillaridan biri boʻlib, ijtimoiy konservativ siyosat, migratsiyani nazorat qilish va iqtisodiy proteksionizmni ilgari suradi.

5. Klaudiya Sheynbaum — Meksika prezidenti

2024 yil iyunida Klaudiya Sheynbaum Meksika tarixidagi ilk ayol prezident sifatida saylandi. Uning oktabrdagi inauguratsiya marosimida minglab odamlar “Prezidentsha!” degan shiorlar bilan uni qarshi olgan.

Sheynbaum yahudiy oilasida tugʻilgan boʻlib, Meksika tarixidagi birinchi yahudiy davlat rahbari hamdir. 2018–2023 yillarda u Mexiko meri sifatida shaharda innovatsion Cablebús transport tizimini joriy etgan. U energetik injiniring sohasida fan doktori va 2007 yilda BMT Iqlim paneli tarkibida Nobel tinchlik mukofotiga sazovor boʻlgan jamoa aʼzosi boʻlgan.

6. Juli Svit — Accenture kompaniyasi boshqaruv raisi va bosh direktori

Juli Svit 2019 yildan beri dunyoning eng yirik konsalting kompaniyalaridan biri — Accenture’ga rahbarlik qilib kelmoqda.

U ilgari kompaniyaning bosh yuriskonsulti boʻlgan, shuningdek, Shimoliy Amerika boʻlimiga rahbarlik qilgan. Svit biznesda tenglik va xilma-xillik muhim ahamiyatga ega ekanini doimiy tarzda targʻib qiladi.

7. Meri Barra — General Motors bosh direktori

Meri Barra 2014 yildan beri General Motors kompaniyasiga rahbarlik qilib, AQShdagi yirik avtomobil ishlab chiqaruvchiga boshchilik qilgan ilk ayolga aylandi.

U elektr avtomobillari va avtonom boshqaruv texnologiyalariga katta sarmoya kiritmoqda. 2025 yilda GM mahalliy ishlab chiqarishga katta investitsiyalar yoʻnaltirishini va zavodlarni modernizatsiya qilishni rejalashtirganini eʼlon qildi.

8. Jeyn Freyzer — Citi banki boshqaruv raisi va bosh direktori

Jeyn Freyzer 2021 yilda Citi bankiga rahbar boʻlib, Uoll-stritdagi yirik bankni boshqargan ilk ayol boʻldi.

U ilgari global isteʼmol biznesi va korporativ strategiya boʻlimlariga rahbarlik qilgan. 2025 yil oktabrida Freyzer bank direktorlar kengashi raisi etib saylandi.

9. Abigeyl Jonson — Fidelity Investments boshqaruv raisi va bosh direktori

Abigeyl Jonson 2014 yildan beri boshqaruvida qariyb 6 trillion dollar aktivga ega boʻlgan Fidelity Investments kompaniyasini boshqarib kelmoqda.

U oilaviy biznesni rivojlantirib, kriptovalyuta va raqamli aktivlar sohasida faol islohotlar olib bormoqda. Jonson 1988 yildan beri kompaniyada ishlaydi va asosiy aksiyadorlardan biri hisoblanadi.

10. Liza Su — AMD (Advanced Micro Devices) bosh direktori

Liza Su 2014 yildan beri AMD kompaniyasiga rahbarlik qilib, uning daromadini 370 foizga oshirishga erishdi va kompaniyani yarimoʻtkazgichlar bozoridagi yetakchilardan biriga aylantirdi.

Tayvanda tugʻilgan Su bolaligida AQShga koʻchib oʻtgan va MIT universitetida doktorlik darajasini olgan. Hozirda u sunʼiy intellekt sohasida Nvidia bilan kuchli raqobatga tayyorgarlik koʻrmoqda.

#nufuzli ayollar

2025 yilning eng nufuzli ayollari kimlar? — Forbes