Mazkur holat yuzasidan Oʻzbekistonning Isroildagi elchixonasi rasmiy izoh berdi.

Maʼlum qilinishicha, 2026 yil 28 fevral kuni Oʻzbekiston fuqarosi N.X. raketa hujumi va sirenalar yangragan vaqtda TikTok tarmogʻiga video joylashtirgan. Videoda aytilgan nojoiz soʻzlar keyinchalik Isroil ijtimoiy tarmoqlarida ham keng tarqalib, mahalliy jamoatchilik orasida norozilikka sabab boʻlgan.

Shundan soʻng Isroil fuqarosi A.X. ushbu holat yuzasidan politsiyaga murojaat qilgan.

Elchixona maʼlumotiga koʻra, vaziyatdan xabardor boʻlishi bilanoq konsullik boʻlimi xodimlari Oʻzbekiston fuqarosi N.X. bilan bogʻlanib, u bilan tegishli suhbat oʻtkazgan. Shuningdek, murojaat qilgan Isroil fuqarosi A.X. bilan ham tushuntirish ishlari olib borilgan.

Elchixona Isroilda boʻlib turgan Oʻzbekiston fuqarolarini mahalliy qonunlarga qatʼiy rioya qilish, xatti-harakatlarda ehtiyotkor boʻlish, provokatsiyalarga berilmaslik hamda raketa hujumlari vaqtida Isroil Front orti qoʻmondonligi tomonidan berilgan xavfsizlik tavsiyalarini toʻliq bajarishga chaqirmoqda.

«Ayni paytda Oʻzbekiston fuqarosi N.X. xavfsiz sharoitda boʻlib, mazkur masala elchixonaning konsullik boʻlimi nazoratida turibdi», deyiladi elchixona bayonotida.

Biroq oʻzbekistonlik muhojirning aynan qayerda va qanday «xavfsiz sharoitda» ekaniga aniqlik kiritilmagan.

#oʻzbekistonlik migrant

Isroilda politsiya ushlagan oʻzbekistonlik boʻyicha rasmiy bayonot berildi