Bu haqda Oʻzbekiston Tashqi ishlar vazirligi maʼlum qildi.

Fojia 13 dekabr kuni sodir boʻlgan. Dastlabki maʼlumotlarga koʻra, otishma oqibatida ikki nafar talaba halok boʻlgan, yana toʻqqiz kishi turli darajada jarohat olgan.

MuhammadAziz Umurzoqovning vafoti haqida birinchi boʻlib uning oila aʼzolari GoFundMe platformasida eʼlon qilingan murojaat orqali xabar bergan. Keyinchalik bu maʼlumot Oʻzbekiston TIV matbuot kotibi tomonidan ham rasman tasdiqlandi.

Marhumning yaqinlariga koʻra, MuhammadAziz kelajakda neyroxirurg boʻlishni orzu qilgan, insonlarga yordam berishni hayotining asosiy maqsadi deb bilgan.

«U nihoyatda mehribon, xushchaqchaq va aqlli edi. Har doim yordamga muhtoj insonlarga ikkilanmasdan qoʻl uzatardi. Oilamiz bu ogʻir yoʻqotishni chuqur iztirob bilan qabul qilmoqda», — deyiladi GoFundMe sahifasida qoldirilgan murojaatda.

Hozirga qadar platforma orqali 3 mingdan ortiq foydalanuvchi oilani qoʻllab-quvvatlash maqsadida qariyb 135 ming dollar xayriya qilgan.

Oʻzbekiston TIV maʼlum qilishicha, AQShdagi diplomatik vakolatxonalar marhumning oila aʼzolari bilan doimiy aloqada boʻlib, mahalliy idoralar bilan hamkorlikda barcha tashkiliy masalalar yuzasidan ish olib bormoqda.

Shuningdek, Amerika–Oʻzbekiston assotsiatsiyasi ham MuhammadAziz Umurzoqovning oilasiga hamdardlik bildirdi. Maʼlumotlarga koʻra, u AQShda ulgʻaygan, Virjiniya shtatidagi Midlotian shahrida maktabni tamomlagan.

Eslatib oʻtamiz, mazkur otishma boʻyicha 24 yoshli Viskonsin shtati fuqarosi Benjamin Erikson qoʻlga olingan. Hodisa yuzasidan tergov ishlari davom etmoqda.

#oʻzbekistonlik talaba

AQShdagi otishma qurbonlari orasida oʻzbekistonlik talaba ham bor