Bu haqda Daily Caller nashri xabar bermoqda.

Maʼlum qilinishicha, respublikachilar Bayden prezidentligining soʻnggi oylarida qabul qilingan 22 ta qarorni bekor qilgan. Ushbu hujjatlar orasida:

qazilma yoqilgʻi qazib olishni cheklash,
benzinli dvigatelli avtomobillar savdosini bosqichma-bosqich qisqartirish,
overdraft toʻlovlarini cheklash orqali fuqarolarning kreditga kirishini qiyinlashtirishga qaratilgan qonunlar mavjud boʻlgan.

Natijada, AQShda bir yil ichida bekor qilingan qonunlar soni 1996 yildan buyon eng yuqori koʻrsatkichga yetgani taʼkidlanmoqda.

3 dekabr kuni esa amaldagi prezident Donald Tramp Bayden shaxsan imzolamagan, balki avtomatik qurilma — avtopen orqali imzolangan barcha hujjatlarning amal qilishini bekor qildi. Oq uy rahbariyati bu qaror afv etish va jazolarni qisqartirishga oid hujjatlarga ham taalluqli ekanini maʼlum qildi.

Avvalroq Tramp Bayden oʻz prezidentligi davomida qabul qilingan hujjatlarning 92 foizini avtopen orqali imzolaganini maʼlum qilgan edi. Shuningdek, sentabr oyida Baydenning Oq uydagi rasmiy portreti avtograf oʻrniga avtopen tasviri bilan almashtirilgani ham keng muhokamalarga sabab boʻlgan.

Trampning fikricha, Bayden muayyan davrlarda toʻliq muomalaga layoqatli boʻlmagan va uning maʼmuriyati avtopen orqali uning nomidan hujjatlar imzolagan. Shu munosabat bilan u yoz oylarida avtopendan foydalanish boʻyicha tergov oʻtkazishni ham buyurgan. Bu holatni Tramp 2020 yilgi saylovlardan keyin AQSh tarixidagi eng shov-shuvli siyosiy mojarolardan biri deb atagan.

Maʼlumot uchun, avvalroq Bayden ham Trampni mamlakat nufuziga putur yetkazishda ayblagan, shuningdek, Yevropa davlatlari rahbarlari tomonidan unga hozirgi siyosiy jarayonlarga qoʻshilish boʻyicha murojaatlar boʻlganini aytgan edi.

#oʻzgarish

AQShda Bayden davrida qabul qilingan oʻnlab qonunlar bekor qilindi