Oliy Majlis Qonunchilik palatasida Inson huquqlari boʻyicha vakil (Ombudsman)ning 2025 yildagi faoliyati toʻgʻrisidagi hisoboti koʻrib chiqildi.

U davlat organlari va mansabdor shaxslar tomonidan inson huquqlariga rioya etilishi ustidan parlament nazoratini amalga oshirdi.

Yil davomida Ombudsmanga jami 26 372 ta murojaat kelib tushdi. Eng koʻp murojaatlar Toshkent shahri, Qashqadaryo va Jizzax viloyatlaridan boʻlgan.

Murojaatlar asosida:

194 ta taʼsir chorasi koʻrildi;
118 nafar masʼul shaxs javobgarlikka tortildi;
fuqarolar foydasiga 11,8 mlrd soʻmdan ortiq mablagʻ undirilishiga erishildi.

Shuningdek, erkinligi cheklangan shaxslar saqlanayotgan joylarga 954 marta monitoring tashrifi amalga oshirildi. Yopiq muassasalar sharoitini yaxshilash uchun 8,5 mlrd soʻmdan ortiq mablagʻ ajratildi.

Yil davomida 90 ta qonun loyihasi ekspertizadan oʻtkazildi va qator takliflar berildi. Ombudsman tavsiyasi bilan 11 ta normativ hujjat qabul qilindi.

Xalqaro hamkorlik ham kengaydi. Jumladan, Rossiya bilan “Yoʻl xaritasi” imzolandi va uning natijasida 31 nafar oʻzbekistonlik talabaga qoʻllangan maʼmuriy jazo bekor qilindi.

Deputatlar Ombudsman faoliyatini ijobiy baholadilar va tegishli qaror qabul qildilar.

#oliy majlis

Ombudsmanning 2025 yilgi faoliyati koʻrib chiqildi