Qayd etilishicha, Davlat xavfsizlik xizmatining Andijon viloyati boʻyicha boshqarmasi xodimlari tomonidan bojxona idoralarini jalb qilgan holda Toshkent shahrida tezkor tadbir oʻtkazilgan. Unda Olmazor tumanida istiqomat qiluvchi, 1966 yilda tugʻilgan A.X. 100 dona oltin tangalarni Andijon shahrida yashovchi, 1963 yilda tugʻilgan E.S.ga 67 ming AQSh dollariga sotgan vaqtida, ularning ikkalasi ham ashyoviy dalillar bilan ushlangan.

Shuningdek, fuqaro A.X.ga tegishli avtomashinadan qoʻshimcha 37 dona oltin tangalar ham tegishli tartibda rasmiylashtirib olingan. Ekspertiza xulosasiga koʻra, sof ogʻirligi jami 776 gr boʻlgan 5 va 10 rubl koʻrinishidagi oltin tangalar numizmatik ashyolar sifatida madaniy boyliklar sirasiga kiradi hamda badiiy, tarixiy ahamiyatga ega hisoblanadi.

"Asllik darajasi 900 va 916 boʻlgan mazkur qadimiy tangalar 1897-1911 yillar oraligʻida bosib chiqarilgan boʻlib, ularning umumiy qiymati 950 mln soʻmni tashkil etadi", deyiladi xafsizlik xizmati tomonidan berilgan xabarda.

Aniqlanishicha, fuqaro E.S. xalq tilida "Nikolay" tangalari deb aytiladigan ushbu tarixiy, moddiy qimmatliklarni Qirgʻiziston Respublikasining Oʻsh viloyatiga olib borib, sotishni rejalashtirgan. Hozirda mazkur shaxslarga nisbatan Jinoyat Kodeksining 177-moddasi 4-qismi "a" bandi bilan jinoyat ishi qoʻzgʻatilib, tergov harakatlari olib borilmoqda.

#oltin tangalar

Qadimiy oltin tangalarni pullamoqchi boʻlganlar ushlandi