17 dekabr kuni Oliy Majlis Qonunchilik palatasi majlisida bir martalik plastik mahsulotlar muomalasini cheklashga qaratilgan qonun loyihasi birinchi oʻqishda qabul qilindi.

Qonun loyihasi ekologik toza hududlarning huquqiy maqomini belgilash, atrof-muhitni muhofaza qilish va tabiiy obʼektlar degradatsiyasining oldini olishni maqsad qilgan.

Qonun loyihasida nimalar nazarda tutilmoqda?

ekologik toza hududlarda tabiiy landshaft va ekotizimlarga zarar yetkazuvchi faoliyatni taqiqlash;
tabiiy organik polimerlardan tashqari bir martalik plastik mahsulotlar muomalasini cheklash;
polietilen paketlarning atrof-muhitga salbiy taʼsirini kamaytirishga qaratilgan normalarni joriy etish.

Plastik chiqindilar bugungi kunda eng dolzarb ekologik muammolardan biri boʻlib, ularning uzoq vaqt parchalanmasligi tabiatga jiddiy zarar yetkazmoqda.

“Oʻzbekiston – 2030” strategiyasi doirasida:

Prezident farmoniga muvofiq, plastik chiqindilarni kamaytirish uchun xalqaro amaliyotda qoʻllaniladigan mexanizmlarni joriy etish rejalashtirilgan. Jumladan:

plastik chiqindilarni yigʻish va utilizatsiya qilish uchun maxsus uskunalar oʻrnatish;
plastik qadoq ishlab chiqaruvchi va import qiluvchilar uchun tarani qaytarish majburiyatini belgilash;
aholi tomonidan topshirilgan har bir plastik idish uchun ragʻbatlantiruvchi toʻlov mexanizmini yaratish.

Ekologiya qoʻmitasi maʼlumotlariga koʻra, Oʻzbekistonda yiliga 10,2 mln tonna qattiq maishiy chiqindi hosil boʻladi. Shundan 10,3 foizi (1,05 mln tonna) plastik chiqindilardir. Plastik buyumlar ishlab chiqaruvchi korxonalar mamlakatning deyarli barcha hududlarida faoliyat yuritadi va polietilen paketlardan foydalanish keng tarqalgan.

Qonun loyihasi plastik chiqindilar hajmini kamaytirish va ekologik barqarorlikni taʼminlashga xizmat qilishi kutilmoqda.

#plastik idishlar

Oʻzbekistonda bir martalik plastik mahsulotlarga cheklov qoʻyiladi