Bu tarixiy voqea nafaqat Oʻzbekiston, balki butun Markaziy Osiyo uchun ham kosmik sohada yangi davrni boshlab beradi. Sidneydagi kongress doirasida Raqamli texnologiyalar vazirligi delegatsiyasi keng qamrovli dastur bilan ishtirok etdi.

Delegatsiya tomonidan Oʻzbekistonning kosmik texnologiyalar sohasidagi yutuqlari va istiqboldagi rejalariga bagʻishlangan taqdimotlar oʻtkazildi.

Shuningdek, Yevropa, Osiyo va Amerika kosmik agentliklari bilan strategik uchrashuvlar tashkil etildi. Bundan tashqari, kosmik monitoring, qishloq xoʻjaligi va ekologiya sohasida raqamli texnologiyalarni qoʻllash boʻyicha qoʻshma loyihalar muhokama qilindi.

Tadbir davomida Xalqaro astronavtika federatsiyasi rahbariyati Oʻzbekistonning ilmiy salohiyati, yoshlarning kosmik fanlarga boʻlgan qiziqishini va infratuzilmani rivojlantirish borasidagi saʼy-harakatlarini yuqori baholab, 2028 yilgi kongressni Samarqand shahrida oʻtkazish tashabbusini qoʻllab-quvvatladi.

Mazkur yirik anjuman nafaqat ilm-fan va texnologiyalar rivoji uchun muhim maydon boʻladi, balki Oʻzbekiston iqtisodiyotiga ham sezilarli daromad keltirishi kutilmoqda. Masalan, Sidneyda oʻtkazilgan joriy kongress Avstraliya iqtisodiyotiga 42 million avstraliya dollari (qariyb 27 million AQSh dollari) daromad olib keldi.

Samarqandda boʻlib oʻtadigan IAC ham 10 mingdan ortiq xalqaro mehmonlarni yurtimizga jalb qilib, xalqaro koʻrgazmalar orqali turizm, xizmat koʻrsatish va tadbirkorlik sohalarida katta iqtisodiy samarani taʼminlaydi.

#sidney

Xalqaro astronavtika kongressi Samarqandda oʻtkaziladi