Rasmiy Mogadisho bu qarorni mamlakat suvereniteti va hududiy yaxlitligiga tahdid soluvchi harakatlar bilan izohladi. Bu haqda Al Jazeera xabar berdi.

Qaror sabablari ochiqlandi

12 yanvar kuni Somali Vazirlar Mahkamasi qarorni rasman eʼlon qildi. Mudofaa vaziri Ahmed Muallim Fiqiy X ijtimoiy tarmogʻidagi bayonotida mazkur qadam BAA tomonidan Somali Respublikasining milliy birligi va siyosiy mustaqilligiga zarar yetkazuvchi amaliyotlar mavjudligiga oid ishonchli maʼlumotlar asosida qabul qilinganini taʼkidladi.

Ayni paytgacha BAA rasmiylari bu qarorga munosabat bildirgani yoʻq.

Somalilend atrofidagi geosiyosiy qarama-qarshilik

Mustaqil tahlilchi Abdinor Dahirning fikricha, Mogadishoning keskin qadami Isroilning 2025 yil dekabr oyida Somalilendni mustaqil davlat sifatida tan olgani ortidan yuzaga kelgan vaziyat bilan bogʻliq boʻlishi mumkin. Somalilend 1991 yilda Somalidan ajralib chiqqan boʻlsa-da, xalqaro hamjamiyat tomonidan rasman tan olinmagan.

«Somali jamoatchiligi orasida BAA Isroilning Somalilendni tan olishiga bilvosita koʻmak bergan, degan fikr keng tarqalgan. Hukumat qarori aynan shu norozilikning siyosiy ifodasi sifatida qabul qilinmoqda», — deydi Dahir.

Investitsiyalar, portlar va taʼsir uchun kurash

Soʻnggi oʻn yil ichida Somalilend BAA uchun Afrikadagi muhim iqtisodiy va logistik nuqtaga aylangan. Ayniqsa, DP World kompaniyasining Berbera portini boshqarish boʻyicha 30 yillik shartnomasi strategik ahamiyat kasb etadi.

#somali

Somali Abu-Dabi bilan aloqalarni keskin uzdi