Ramazon butun dunyo musulmonlari tinchlik, totuvlik va birdamlik qadriyatlarini nishonlaydigan va tarqatadigan oydir, ammo Gʻazoda qotilliklar, portlashlar va qon toʻkilishlar davom etmoqda, dedi BMT rahbari.

“Men Ramazon ruhini oʻt ochishni toʻxtatish va insonparvarlik yordamini kerakli tezlik va miqdorda yetkazib berish yoʻlidagi barcha toʻsiqlarni bartaraf etish orqali ulugʻlashni qatʼiy talab qilaman”, - dedi Guterrish jurnalistlarga.

Uning qayd etishicha, u BMT Bosh kotibi boʻlgan davrda tinch aholini oʻldirish va vayronagarchiliklar misli koʻrilmagan darajaga yetgan.

BMT Bosh kotibining fikricha, xalqaro gumanitar huquq vayronaga aylangan. U Isroilning Rafahga hujum qilish xavfi Gʻazo ahli uchun juda falokatli boʻlishi mumkinligidan ogohlantirdi.

A. Guterrish, shuningdek, Sudanni Ramazon oyida harbiy harakatlarni toʻxtatishga chaqirdi.

"Ochlik, dahshat va aql bovar qilmaydigan qiyinchiliklarga duch kelayotgan Sudan xalqi uchun janglar tugatilishi kerak", - dedi u.

"Men butun dunyodagi siyosiy, diniy va jamoat rahbarlarini ushbu muqaddas davr hamdardlik, harakat va tinchlik davriga aylanishi uchun qoʻllaridan kelganini qilishga chaqiraman", dedi u.

#sudan

BMT Bosh kotibi Gʻazo sektori va Sudanda Ramazon oyida oʻt ochishni toʻxtatishga chaqirdi