Bu haqda Tashqi ishlar vazirligi matbuot kotibi Ahror Burxanov maʼlum qildi.

Maʼlum qilinishicha, hodisa 11 yanvar kuni sodir boʻlgan. Dastlabki maʼlumotlarga koʻra, kater baliqchi trauleri bilan toʻqnashib, agʻdarilib ketgan va keyinchalik choʻkib qolgan. Halokat oqibatida 18 yoshli Rossiya fuqarosi boʻlgan ayol halok boʻlgan, 23 nafar rossiyalik sayyoh turli darajadagi tan jarohatlari bilan shifoxonaga yotqizilgan.

Kater bortida uch nafar Oʻzbekiston fuqarosi ham boʻlgan. Ulardan ikki nafari yengil tan jarohati olgan va mahalliy tibbiyot muassasasiga joylashtirilgan. Hozirda jabrlangan fuqarolar toʻliq sogʻaygan va belgilangan tartibda shifoxonadan chiqarilgan.

Tashqi ishlar vazirligi maʼlumotiga koʻra, jabrlanganlarning barcha tibbiy hamda boshqa zarur xarajatlari katerga egalik qiluvchi kompaniyaning sugʻurta mablagʻlari hisobidan toʻliq qoplab berilgan.

Hodisa yuzasidan Pxuket va Krabi provinsiyalari politsiyasi tomonidan tergov ishlari olib borilmoqda. Halokat sabablari aniqlanmoqda.

Shuningdek, Oʻzbekiston Respublikasining Bangkok shahridagi Bosh konsulxonasi mahalliy huquqni muhofaza qiluvchi organlar va sogʻliqni saqlash muassasalari bilan doimiy aloqada boʻlib kelgani maʼlum qilindi.

#tayland

Oʻzbekistonliklar boʻlgan sayyohlik kateri halokatga uchradi