«Bugun juda yaxshi uchrashuv boʻladi deb oʻylayman», — dedi Donald Tramp Zelenskiyni qarorgoh oldida kutib olar ekan. AQSh prezidenti jurnalistlar savollariga javob berib, xavfsizlik boʻyicha kelishuv boʻlishini, ammo unda aniq nima yozilishi hozircha nomaʼlumligini aytdi.

«Bu jiddiy kelishuv boʻladi», — deya taʼkidladi u.
Trampning soʻzlariga koʻra, Rossiya prezidenti ham, Ukraina prezidenti ham tinchlikka erishishni istamoqda. «Biz muzokaralarning yakuniy bosqichidamiz. Bu jarayon yaqin orada yakunlanishi yoki uzoqqa choʻzilishi mumkin», — dedi u.

Shuningdek, Tramp muzokaralardan soʻng Vladimir Putin bilan yana telefon orqali gaplashishini maʼlum qildi. Kreml ham Rossiya va AQSh prezidentlari oʻrtasida telefon muloqoti boʻlganini tasdiqladi. Rossiya prezidenti yordamchisi Yuriy Ushakovning aytishicha, Putin suhbat davomida jangovor harakatlarni toʻliq toʻxtatish uchun Kiyevdan Donbass boʻyicha siyosiy qaror talab etilishini bildirgan.

Zelenskiy esa Mar-a-Lagodagi uchrashuv oldidan AQSh tomoni bilan Ukrainaga oid hududiy masalalarni muhokama qilishini aytdi. Uchrashuv boshlanishi arafasida Donald Tramp jurnalistlardan zalni tark etishni soʻrab, muzokaralar yopiq formatda oʻtishiga ishora qildi.

#uchrashuv

Zelenskiy Tramp bilan uchrashdi