"Mirabror Usmonov kubogi" bu – 23 yoshgacha boʻlgan futbolchilar oʻrtasida har yili oʻtkaziladigan xalqaro xotira turniri boʻlib, Osiyo mintaqasidagi yosh futbolchilarni bir maydonga jamlaydi. Turnir Toshkent shahrida oʻtkaziladi va 23 yoshgacha boʻlgan Oʻzbekiston, Saudiya Arabistoni hamda Yaponiya jamoalari ishtirokida oʻtadi.

Turnir Oʻzbekiston sport va futbol tarixida alohida oʻrin tutgan Mirabror Zufarovich Usmonov (1947–2019) nomi bilan ataladi. Mirabror Usmonov uzoq yillar davomida mamlakat sport siyosatini shakllantirishda muhim rol oʻynagan; Oʻzbekiston Milliy Olimpiya qoʻmitasi (2013–2017) va Oʻzbekiston Futbol Federatsiyasi prezidenti (2005–2017), shuningdek, Markaziy Osiyo Futbol uyushmasi prezidenti (2015–2018 yillarda) sifatida faoliyat olib borgan. Uning xotirasini abadiylashtirish maqsadida tashkil etilgan ushbu musobaqa nafaqat sport bayrami, balki unga boʻlgan hurmat ifodasi hamdir.

Turnir taqvimi quyidagicha:

22 iyul | 20:00 – Oʻzbekiston vs. Saudiya Arabistoni
25 iyul | 20:00 – Saudiya Arabistoni vs. Yaponiya
28 iyul | 20:00 – Oʻzbekiston vs. Yaponiya
Uchrashuvlar "JAR" stadionida tashkil etiladi.

Oʻzbekiston U‑23 jamoasi tarkibi:
Bosh murabbiy Ravshan Haydarov boshchiligida tuzilgan jamoa quyidagi futbolchilardan iborat:

Darvozabonlar:
Otabek Boymurodov, Samandar Muratbayev, Edem Nemanov.

Himoyachilar:
Diyor Ortiqboyev, Otabek Ahadov, Izzatillo Poʻlatov, Mahmud Mahamadjonov, Xondamir Mustafoqulov, Saidafzalxon Axrorov, Jahongir Oʻrozov, Dilshod Abdullayev, Zafarmurod Abdiraxmatov.
Yarim himoyachilar:
Muhammadali Reʼimov, Behruz Asqarov, Sherzod Esanov, Sardor Bahromov, Oybek Oʻrmonjonov, Ravshan Xayrullayev, Nodir Abdurazzoqov, Asilbek Jumayev, Nosir Abdusalomov.
Hujumchilar:
Aziz Xolmurodov, Samandar Mavlonqulov, Rustam Turdimurodov, Amirbek Baqayev.

2024 yildagi "Mirabror Usmonov kubogi" futzal yoʻnalishida oʻtkazilgan boʻlib, unda Oʻzbekiston, Gvatemala, Qirgʻiziston va Tojikiston jamoalari ishtirok etgan. Finalda Oʻzbekiston Gvatemala ustidan 7:4 hisobida gʻalaba qozonib, kubok sohibiga aylangan edi. Har yilgi format oʻzgarib turadi – bu yilgi musobaqa yana futbol shaklida tashkil etilmoqda.

#xotira turniri

Mirabror Usmonov nomidagi xotira turniri ertadan start oladi