Soʻnggi yillarda Oʻzbekistonning oziq-ovqat importi tarkibida xurmo mahsuloti salmoqli oʻrin egallay boshladi. Xurmo, asosan, urugʻidan koʻkartirilgan niholga payvandlash yoʻli bilan koʻpaytiriladi. Qumli, shagʻalli va shoʻr yerlarda oʻstirish qiyin. Bir tup daraxtdan 250 kilogacha hosil olinadi.

Milliy statistika qoʻmitasi maʼlumotlariga koʻra, 2025 yil yanvar-iyul oylarida Oʻzbekistonga 17 ta davlatdan jami 12,6 ming tonna xurmo import qilingan. Bu koʻrsatkich oʻtgan yilning shu davriga nisbatan 4,9 ming tonnaga koʻpdir. Import hajmi qiymat jihatdan esa 9 million AQSh dollariga teng boʻlib, bu xurmoning nafaqat narxli, balki bozorda barqaror talabga ega mahsulotga aylanganini koʻrsatadi.

Import hajmi ortishini bir qator omillar bilan izohlash mumkin. Avvalo, aholining sogʻlom ovqatlanishga boʻlgan qiziqishi, Ramazon oyi davomida xurmo isteʼmolining anʼanaviy tarzda koʻpayishi, shuningdek, ichki bozorda xurmo yetishtirish hajmining pastligi.

Joriy yilning 7 oyida Oʻzbekistonga eng koʻp xurmo yetkazib bergan davlatlar quyidagilar: Eron – 9,8 ming tonna, Tunis – 810 tonna¸Turkiya – 396 tonna, Saudiya Arabistoni – 245 tonna, Qozogʻiston – 230 tonna, Ozarbayjon – 224 tonna, BAA – 196 tonna va boshqa davlatlardan 624 tonna.

Diqqatga sazovor jihati shundaki, Oʻzbekistonga eng koʻp xurmo yetkazib bergan davlatlar orasida Eron – 9,8 ming tonna bilan yetakchilik qilmoqda. Saudiya Arabistonidan 245 tonna xurmo import qilingani Oʻzbekistonda sifatli, brendli va diniy-maʼnaviy ahamiyatga ega mahsulotlarga ham talab yuqoriligidan dalolat beradi.

#xurmo

Oʻzbekistonda xurmo isteʼmoliga talab oshmoqda