Isroil armiyasi Yamanning «Ansarulloh» (husiylar) harakati nazoratidagi poytaxti Sana shahriga 10 dan ortiq havo zarbasini berdi. Bu haqda «Al-Masira» telekanali xabar berdi.

«Anadolu» agentligi maʼlumotlariga koʻra, zarbalar husiylar yetakchisi Abdulmalik al-Husiy nutq soʻzlayotgan vaqtda amalga oshirilgan. Poytaxtning bir nechta tumanlarida kuchli portlashlar sodir boʻlgan. Isroilning KAN davlat telekanali xabar berishicha, zarbalarning maqsadi husiylar harakatining «muhim shaxslari» boʻlgan.

Isroil armiyasining rasmiy bayonotida aytilishicha, havo zarbalari Yaman poytaxtidagi husiylarga tegishli obʼektlarga qaratilgan.

Isroil mudofaa vaziri Isroil Kats armiyaning boshqaruv markazidan shaxsan operatsiyani kuzatgani haqida vazirlik maʼlum qildi.

Kats taʼkidlashicha, Eron qoʻllab-quvvatlayotgan husiylarga Isroil tomonidan bir necha bor ogohlantirish berilgan. «Kimki Isroilga qarshi qoʻl koʻtarsa, ogʻir oqibatlarga duch keladi», — dedi vazir.

Hozircha havo zarbalari oqibatida halok boʻlganlar yoki yaralanganlar haqida maʼlumot yoʻq.

#yaman

Isroil armiyasi Yaman poytaxtiga bir qator havo zarbalari yoʻlladi