Rossiya Tashqi ishlar vazirligi 2026 yil 15 yanvar kuni boʻlib oʻtgan brifingda teleboshlovchi va provokatsion chiqishlari bilan tanilgan Vladimir Solovyovning Markaziy Osiyo va Kavkazga oid shov-shuvli bayonotlari haqidagi savolga javob berdi.

Zaxarovaning taʼkidlashicha, Solovyovning qarashlari — jurnalistning “shaxsiy fikri” boʻlib, Moskvaning rasmiy pozitsiyasi emas.

“Teleboshlovchi Vladimir Solovyovning Rossiya tashqi siyosati haqidagi bayonotlari uning shaxsiy fikridir va amalda Rossiya Federatsiyasining rasmiy pozitsiyasi hisoblanmaydi”, — dedi Rossiya TIV matbuot kotibi Mariya Zaxarova.

Uning soʻzlariga koʻra, Solovyov oʻz fikrlarini davlat telekanalida emas, balki “Solovyov LIVE” nomli shaxsiy kanalida bildirgan. Zaxarova jurnalist nutqini shaxsan oʻrganganini aytib, u yerda qatʼiy chaqiriq emas, balki “ritorik savol” shaklidagi mulohaza mavjudligini taʼkidladi.

“Bu jurnalistning fikri. Fikr shaxsiy kanalda aytilgan. Men iqtiboslarni oʻqidim va kontekstdan yulib olingan iboralarga tayanmadim. Bunga javob berish mening ishim emas”, — dedi u.

Masʼuliyatni boshqalarga yuklash va provokatsiya haqidagi ayblovlar

Zaxarovaning taʼkidlashicha, muammo Solovyovning soʻzlarida emas, balki ularni kontekstdan yulib olib, Rossiyaning rasmiy pozitsiyasi sifatida taqdim etayotgan “divan tahlilchilari”dadir. U bunday talqinlarni provokatsiya deb atab, ular sobiq SSSR davlatlariga nisbatan Rossiyaning goʻyo “tajovuzkor niyatlari” haqida asossiz qoʻrquv uygʻotishga qaratilganini bildirdi.

Eslatib oʻtish joiz, Solovyov oʻz dasturida Ukrainadagi urushni misol qilib, Armaniston va Markaziy Osiyoga qarshi ehtimoliy harbiy harakatlar haqida gapirgan edi.

Rasmiy Moskva pozitsiyasiga koʻra, davlatning rasmiy nuqtai nazarini faqat vakolatli mansabdor shaxslar ifoda etadi. Shu sababli, shaxsiy media platformalarda bildirilgan har qanday fikrlar davlat siyosati sifatida qabul qilinmasligi lozim.

Ushbu yondashuv Rossiya axborot makonida tez-tez uchrab turadigan tajovuzkor ritorika uchun davlat masʼuliyatni oʻz zimmasiga olmasligini yana bir bor namoyon etadi. Shu bilan birga, bunday bayonotlarning oldini olish yoki ularni qoralash rejalari mavjud emasligini ham koʻrsatadi.

Xulosa qilib aytganda, Rossiya TIV Solovyovning soʻzlaridan norozi boʻlgan tomonlarni goʻyoki fikrni notoʻgʻri talqin qilganlikda va provokatsiyaga berilganlikda ayblamoqda.

#zaxarova

"Solovyovning qarashi rasmiy pozitsiya emas" - Rossiya TIV munosabat bildirdi