АҚШ ҳарбийлари Ироқдаги базасини тарк этди

Бу ҳақда Ироқ Мудофаа вазирлигига таяниб, CNN хабар берди.

Ал-Асад авиабазаси Ироқ назоратига ўтди

Ироқ Мудофаа вазирлиги маълум қилишича, АҚШ ҳарбий маслаҳатчиларининг сўнгги контингенти мамлакат ғарбидаги Анбар вилоятида жойлашган Ал-Асад авиабазасини тарк этган. Ушбу база 20 йилдан ортиқ вақт давомида АҚШ қўшинлари фойдаланиб келган асосий объектлардан бири ҳисобланар эди.

Шунингдек, ИШИДга қарши кураш доирасида фаолият юритган АҚШ етакчилигидаги кўп миллатли коалиция ҳам “Бирлашган операциялар қўмондонлиги” қароргоҳидан чиқиб кетган. Вазирликка кўра, барча бинолар ва инфратузилма объектлари эндиликда Ироқ хавфсизлик кучларининг тўлиқ назоратига ўтган.

Ироқ Мудофаа вазирлиги эълон қилган видеоларда юқори мартабали ҳарбий қўмондонлар Ал-Асад авиабазасидаги бўш қолган бинолар ва йўлакларни кўздан кечираётгани акс этган. АҚШ Мудофаа вазирлигининг Марказий қўмондонлиги (CENTCOM) ҳам объектларни топшириш жараёни якунланганини тасдиқлади.

Курдистон ҳудуди бундан мустасно

Маълум қилинишича, АҚШ қўшинларининг чиқиб кетиши фақат Ироқнинг федерал ҳудудларига тааллуқли. Мамлакат шимолидаги ярим мустақил ҳудуд — Ироқ Курдистонида Америка ҳарбийлари қолмоқда.

Хусусан, Арбил вилоятида жойлашган Ҳарир авиабазасида АҚШ қўшинлари ҳали ҳам мавжуд. Ироқ марказий ҳукумати мазкур ҳудудни тўлиқ назорат қилмайди, чунки Курдистон Ироқ конституциясига мувофиқ ўз ҳукумати, парламенти ва хавфсизлик кучларига эга бўлган автоном федерал субъект ҳисобланади.