Депутатлик сайловида муддатидан олдин овоз бериш қачон бўлиши айтилди

Унда айтилишича, муддатидан олдин овоз бериш кунларидаги сайлов участкаларида овоз бериш вақти иш кунларида соат 9:00 дан 18:00 га қадар, дам олиш кунларида эса соат 11:00 дан 17:00 га қадар давом этади. Бундан ташқари, Ўзбекистон Республикасининг чет давлатлардаги дипломатик ва бошқа ваколатхоналари ҳузурида тузилган сайлов участкаларида муддатидан олдин овоз бериш ушбу сайлов участкалари жойлашган давлатдаги маҳаллий вақт билан соат 9:00 дан 18:00 га қадар амалга оширилади. 

Марказий сайлов комиссиясига кўра, жорий йил 27 октябрь куни ўтказиладиган сайловда Олий Мажлис Қонунчилик палатасига 11 нафар ва маҳаллий кенгашларга 605 нафар ногиронлиги бўлган шахслар депутатликка номзод сифатида рўйхатга олинган. Сайлов комиссиялари таркибида эса 1343 нафар ногиронлиги бўлган шахслар фаолият кўрсатиб келмоқда. 

Бўлажак сайловларда ногиронлиги бўлган шахсларнинг конституциявий ҳуқуқларини янада кенгроқ таъминлаш мақсадида 830 мингдан ортиқ ногиронлиги бўлган сайловчиларга кўмак берувчи кўнгиллилар бириктирилмоқда.

"Ногиронлиги бўлган шахсларга ўз сайлов ҳуқуқларини амалга ошириши учун зарур шарт-шароитлар яратиш мақсадида сайлов бюллетенларини тўлдириш учун Брайл алифбоси асосидаги трафарет намунасини тасдиқлаш, сайлов участкаларида ногиронлиги бўлган ва жисмоний имконияти чекланган шахслар учун махсус жиҳозланган яширин овоз бериш кабиналари, оптик лупалар (катталаштирувчи ойналар) ҳамда қўшимча ёриткичлар ўрнатиш ҳамда сайлов участкасига мустақил равишда бора олмайдиган сайловчиларнинг сайлов куни турган жойларида овоз беришини ташкил этилади", дейилади Марказий сайлов комиссиясининг навбатдаги мажлисида.

Шунингдек, унда Марказий сайлов комиссиясининг қарори билан Туркий Давлатлар Парламент Ассамблеясининг 19 нафар, Шанхай ҳамкорлик ташкилоти, МДҲ Парламентлараро Ассамблеяси, Россия ва Хитойдан 2 нафардан, АҚШнинг 3 нафар ҳамда Буюк Британия, Латвия, Литва, Франция, Ҳиндистон ва Япониянинг 1 нафардан вакиллари, жами 36 нафар хорижий ва халқаро кузатувчилар аккредитациядан ўтказилгани таъкидланган.