Россияда Давлат думаси сайловлари бошланди

Россияда Давлат думаси депутатлари сайлови 18 сентябрь куни бошланди. Овоз бериш 18, 19 ва 20 сентябрь кунлари давом этади. Биринчи сайлов участкалари Камчатка ўлкаси ва Чукотка автоном округида маҳаллий вақт билан соат 08:00 да иш бошлади.

Айрим олис ва бориш қийин бўлган ҳудудларда, шунингдек ҳарбий хизматчилар учун муддатидан олдин овоз бериш август ойи охиридан бошланган.

Камчатка ўлкаси сайлов комиссияси маълумотларига кўра, 17 сентябрга қадар 11,5 мингдан ортиқ сайловчи овоз берган. Уларнинг 5 097 нафари денгизда, қарийб 6,5 минг нафари эса қуруқликда овоз берган.

Чукоткада эса 4 054 нафар сайловчи муддатидан олдин овоз берган. Улар орасида геологлар, метеорологлар, буғучилар, ҳарбийлар ва кончилик соҳаси ходимлари бор.

Бу сайловда Россия Давлат думасининг 450 нафар депутати сайланади. Уларнинг 225 нафари партия рўйхатлари бўйича, яна 225 нафари бир мандатли сайлов округлари орқали сайланади.

Сайлов бюллетенига федерал рўйхат бўйича 10 та сиёсий партия киритилган. «Яблоко» партиясининг федерал рўйхати эса суд қарори кучга кирганидан сўнг сайлов бюллетенидан чиқарилган.

Россиядаги амалдаги Давлат думаси 2021 йилда сайланган бўлиб, унинг ваколат муддати 2026 йил кузида якунланади.