Тошкентда октябрдан метро ва автобусларда йўл ҳаққи оширилади

2026 йил 1 октябрдан бошлаб Тошкент шаҳрида жамоат транспортида йўл ҳаққи картадан тўлов учун 1 минг 700 сўмдан 2 минг 500 сўмга (47 фоиз) оширилади. Бу бўйича Халқ депутатлари Тошкент шаҳри кенгашининг қарори эълон қилинди.

Нақд пулдаги тўлов учун эса чипта қиймати оширилмайди, яъни амалдаги 3 минг сўмлигича қолади.

Қарорга кўра, транспорт картасидан фойдаланадиганлар учун имтиёзли ва бепул тарифлар амал қилади. Масалан, йўловчи ATTO картасидан автобусга тўлов қилиб, бир соат ичида бир йўналишдан бошқасига ўтса, иккинчи тўлов 1500 сўм бўлади (ҳозир 700 сўм). Бир соат давомида учинчи ва тўртинчи автобусда ҳаракатланиш эса бепул.

Бир соатлик тарифда метродан фақат бир марта фойдаланишга рухсат этилади. Иккинчи марта метродан фойдаланганда 60 дақиқалик ҳисоб даври янгидан бошланади.

Кенгаш қатновлар сонига боғлиқ ҳолда белгиланган транспорт карталарининг тарифларини ҳам белгилаган. Унга кўра, автобусда ҳаракатланиш учун бир кунлик карта нархи 11 минг 500 сўм, 30 кунлик қиймат 250 минг сўм. Метрода кунлик тариф 13 минг 500 сўм, ойлик нарх 345 минг сўмни ташкил этади.

Аввалроқ Фискал таҳлиллар институти Ўзбекистонда жамоат транспорти учун йўл ҳаққини иқтисодий асосланган даражага ошириш таклиф қилганди. Қайд этилишича, ҳозирда жамоат транспорти харажатларининг 65,1 фоизи субсидия, яъни давлат бюджети ҳисобидан қопланмоқда. Субсидиялар ҳажми 2024 йилдаги 1 триллион сўмдан 2025 йилда 1,2 триллион сўмга, 2026 йилда эса 1,385 триллион сўмга етган.

Институт ҳисоб-китобларига кўра, брутто-шартномаларни молиялаштириш учун йилига 1,9 триллион сўм талаб этилади. Шундан 1,3 триллион сўми Тошкент шаҳри жамоат транспортига тўғри келади.