Ўзбекистонда онлайн харидорларнинг 70 фоизи ишлатилган товар сотиб олган

Ўзбекистонда интернет орқали харид қиладиган аҳолининг 70 фоизи ҳаётида камида бир марта хусусий сотувчилардан аввал ишлатилган товар сотиб олган. Бу Listee қайта сотув платформаси буюртмаси асосида ORO тадқиқот агентлиги ўтказган сўровномада маълум бўлди.

2025 йил декабрь ойида ўтказилган тадқиқотда Ўзбекистоннинг барча ҳудудларидан 18 ёшдан 60 ёшгача бўлган 1 849 нафар респондент иштирок этган. Сўровнома онлайн панель орқали ташкил этилган.

Тадқиқот натижаларига кўра, аввал ишлатилган товарлар орасида кийим-кечак, пойабзал, сумка ва электроника энг кўп харид қилинган йўналишлар ҳисобланади. Респондентларнинг 27 фоизи кийим-кечак, пойабзал ва сумка, яна 27 фоизи эса электроника маҳсулотларини хусусий сотувчилардан харид қилганини билдирган.

Қурилиш ва таъмирлаш материалларини сотиб олганлар 17 фоизни ташкил этган. Болалар товарлари ва ўйинчоқлари 16 фоиз, йирик маиший техника 15 фоиз, кичик маиший техника 14 фоиз, мебель эса 13 фоиз кўрсаткичга эга бўлган.

Ёшлар орасида қизиқиш юқорироқ

Сўровномада 25–34 ёшлилар аввал ишлатилган товарларни харид қилиш бўйича энг фаол гуруҳ сифатида қайд этилган. Бу ёш тоифасидагиларнинг 80 фоизи камида бир марта хусусий сотувчидан товар сотиб олган.

Улар орасида электроника энг оммабоп йўналиш бўлиб, 39 фоиз иштирокчи бундай маҳсулотларни харид қилганини айтган.

45–60 ёшлилар эса нисбатан эҳтиёткор. Ушбу гуруҳ вакилларининг 38 фоизи ҳеч қачон хусусий сотувчилардан товар харид қилмаганини билдирган.

Харидорлар учун ишонч биринчи ўринда

Тадқиқотда онлайн савдодаги хавфсизлик масаласига ҳам алоҳида эътибор қаратилган. Натижаларга кўра, харидорларнинг 87 фоизи шахсий маълумотларнинг ишончли ҳимоя қилинишини муҳим деб ҳисоблайди. 86 физи фирибгарликдан ҳимояланишга, 83 физи эса сотувчи томонидан фирибгарлик содир этилган тақдирда пулни қайтариб олиш имкониятига аҳамият беради.

Шу билан бирга, хусусий шахсларнинг интернет орқали товар сотиши харид қилишга нисбатан анча кам тарқалган. Тадқиқотга кўра, сўнгги олти ой давомида Ўзбекистон аҳолисининг 8 фоизи интернет орқали мустақил равишда товар сотган. Яна 9 фоизи келгуси бир йил ичида бундай савдони синаб кўришга тайёрлигини билдирган.

Муаллиф: Ҳасанбой ОЧУН