Пневмонияни қандай олдини олиш мумкин?

Пневмония ўзи қандай касаллик?

"Пневмония (зотилжам) ўпкадаги яллиғланиш жараёни. Бунга бактериялар ёки бошқа касалликлар сабаб бўлиши мумкин. Грипп, коронавирус ёки ОИВ шулар жумласидан", дейди мутахассис.

Шунингдек, у мазкур хасталик дунёда ўлим сабаблари бўйича тўртинчи ўринда туришига ҳам тўхталиб, пневмониядан энг кўп азият чекувчи қатлам болалар, кекса ёшли ва иммунитети заиф инсонлар ҳамда сурункали хасталиги бор беморлар эканлигини айтган.

Касалликнинг қандай аломатлари бор?

"Мазкур патологияда пастки нафас йўллари зарарланди. Одамларда йўтал ва балғам пайдо бўлади, баъзида нафас қисиши, бош оғриғи, кўнгил айниши, қусиш кузатилади. Зотилжам кўп ҳолларда юқори тана ҳарорати, ҳолсизлик ва ҳорғинлик каби аломатлар билан кечади", дея қўшимча қилди Мавлуда Табибова.

Табибова  яллиғланиш жараёни айниқса, болалар ва сурункали касалликларга чалинган кишиларда оғир кечишини билдириб, кекса ёшли одамларда ушбу симптомлар жараёни яққол намоён бўлмаслиги мумкинлигига ҳам тўхталган.

"Кашандалик ва спиртли ичимликлар истеъмоли пневмония ривожланиш хавфини оширувчи омиллар сирасидан. Чунки айни шу иллатлар нафас олиш тизимининг ҳимоя механизмлари бузилишига олиб келади", дея таъкидлаган у.

Пневмонияни қандай олдини олса бўлади?

"Зотилжамдан ҳимояланишнинг энг оқилона ва самарали йўли пневмококк ва гриппга қарши эмланишдир. Қолаверса, шахсий гигиена ва соғлом турмуш тарзига риоя қилиш орқали ҳам бу дарддан узоқ бўлиш мумкин", дейди шифокор.

Бундан ташқари, у зарур муолажани белгилаш учун бемор тегишли тиббий таҳлиллар топшириши кераклиги ва бу қанча эрта амалга оширилса, даво чоралари шунча самарали бўлишига тўхталган. Акс ҳолда, касаллик хавфли асоратларни келтириб чиқариши эҳтимоли юқоригини таъкидлаган.