Pnevmoniyani qanday oldini olish mumkin?

Pnevmoniya oʻzi qanday kasallik?

"Pnevmoniya (zotiljam) oʻpkadagi yalligʻlanish jarayoni. Bunga bakteriyalar yoki boshqa kasalliklar sabab boʻlishi mumkin. Gripp, koronavirus yoki OIV shular jumlasidan", deydi mutaxassis.

Shuningdek, u mazkur xastalik dunyoda oʻlim sabablari boʻyicha toʻrtinchi oʻrinda turishiga ham toʻxtalib, pnevmoniyadan eng koʻp aziyat chekuvchi qatlam bolalar, keksa yoshli va immuniteti zaif insonlar hamda surunkali xastaligi bor bemorlar ekanligini aytgan.

Kasallikning qanday alomatlari bor?

"Mazkur patologiyada pastki nafas yoʻllari zararlandi. Odamlarda yoʻtal va balgʻam paydo boʻladi, baʼzida nafas qisishi, bosh ogʻrigʻi, koʻngil aynishi, qusish kuzatiladi. Zotiljam koʻp hollarda yuqori tana harorati, holsizlik va horgʻinlik kabi alomatlar bilan kechadi", deya qoʻshimcha qildi Mavluda Tabibova.

Tabibova  yalligʻlanish jarayoni ayniqsa, bolalar va surunkali kasalliklarga chalingan kishilarda ogʻir kechishini bildirib, keksa yoshli odamlarda ushbu simptomlar jarayoni yaqqol namoyon boʻlmasligi mumkinligiga ham toʻxtalgan.

"Kashandalik va spirtli ichimliklar isteʼmoli pnevmoniya rivojlanish xavfini oshiruvchi omillar sirasidan. Chunki ayni shu illatlar nafas olish tizimining himoya mexanizmlari buzilishiga olib keladi", deya taʼkidlagan u.

Pnevmoniyani qanday oldini olsa boʻladi?

"Zotiljamdan himoyalanishning eng oqilona va samarali yoʻli pnevmokokk va grippga qarshi emlanishdir. Qolaversa, shaxsiy gigiyena va sogʻlom turmush tarziga rioya qilish orqali ham bu darddan uzoq boʻlish mumkin", deydi shifokor.

Bundan tashqari, u zarur muolajani belgilash uchun bemor tegishli tibbiy tahlillar topshirishi kerakligi va bu qancha erta amalga oshirilsa, davo choralari shuncha samarali boʻlishiga toʻxtalgan. Aks holda, kasallik xavfli asoratlarni keltirib chiqarishi ehtimoli yuqorigini taʼkidlagan.