Ўзбекистонда 5 та янги университет очилади

Жорий йилнинг 20 январь куни "Cyber university" давлат университетини ташкил этиш тўғрисида"ги Президент қарори қабул қилинди. Унга кўра, "Cyber university" давлат университети ташкил этилади. 

Ахборотни ҳимоялаш, ахборот ва киберхавфсизлик, рақамли технологиялар ва рақамли иқтисодиёт, сунъий интеллектга асосланган автоматлаштирилган ахборот-таҳлилий тизимларни яратиш, робототехника ва бошқа турдош соҳалар бўйича кадрлар тайёрлаш yниверситетнинг асосий вазифаларидан бири этиб белгиланган. 

Қайд этилишича, 2025-2026 ўқув йили учун мазкур университетга бакалаврлар тайёрлаш бўйича кундузги таълим шаклига 100 та давлат гранти ажратилади. Университетда ўқув жараёни 2025 йил сентябрь ойида бошланади. 

Шунингдек, 24 январь куни Президент томонидан "Бухоро давлат техника университетини ташкил этиш тўғрисида”ги қарори ҳам қабул қилинди. Унга кўра, Бухоро муҳандислик-технология институти ҳамда Бухоро табиий ресурсларни бошқариш институти негизида Бухоро давлат техника университети ташкил этилади. 

Муҳандислик, ишлаб чиқариш, озиқ-овқат технологияси, енгил саноат, нефт ва газ, яшил энергетика, архитектура ва қурилиш, транспорт ва логистика, агротехнология, ахборот технологиялари ва дастурлаш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлаш университетнинг асосий вазифаларидан бири этиб белгиланган. 

Бундан ташқари, ўша куни, яъни 24 январда "Наманган давлат техника университетини ташкил этиш тўғрисида”ги Президент қарори ҳам имзоланди. Қарорга кўра, Наманган муҳандислик-технология институти, Наманган муҳандислик-қурилиш институти ва Наманган тўқимачилик саноати институти негизида Наманган давлат техника университети ташкил этилади. 

Муҳандислик, қурилиш, тўқимачилик, ахборот технологиялари ва дастурлаш, ишлаб чиқариш, қайта ишлаш ҳамда хизмат кўрсатиш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлаш университетнинг асосий вазифаларидан бири этиб белгиланган. 

Орадан бир кун ўтиб, 25 январь куни "Нукус давлат техника университетини ташкил этиш тўғрисида”ги Президент қарори эълон қилинди. Унга кўра, Навоий давлат кончилик ва технологиялар университети ҳузуридаги Нукус кончилик институти ҳамда Тошкент ахборот технологиялари университети Нукус филиали негизида Нукус давлат техника университети ташкил этилади. 

Саноат, техника-технология, муҳандислик соҳалари учун олий маълумотли мутахассислар ва илмий-педагогик кадрлар тайёрлаш, қайта тайёрлаш ҳамда уларнинг малакасини ошириш университетнинг асосий вазифаларидан бири этиб белгиланган. 

Бу кунда ҳам янги олим таълим муассасасини очишга доир иккинчи қарор — "Туркий давлатлар халқаро университетини ташкил этиш тўғрисида"ги Президент қарори қабул қилинди. Унга кўра, Тошкент шаҳрида Туркий давлатлар халқаро университети ташкил этилади. Қуйидагилар Университет фаолиятининг асосий йўналишлари этиб белгиланган: 

 — Муҳандислик, қурилиш, логистика, ахборот технологиялари ва дастурлаш, соғлиқни сақлаш, қишлоқ хўжалиги, озиқ-овқат саноати ҳамда иқтисодий ва ижтимоий соҳа учун халқаро стандартларга мувофиқ олий маълумотли кадрлар тайёрлаш; 

— Ўқув дастурларини хорижий, шу жумладан, Туркиянинг етакчи олий таълим ташкилотлари билан ҳамкорликда, шунингдек, қўшма таълим дастурлари асосида жорий этиш ҳамда илмий-тадқиқотлар олиб бориш. 

Мазкур университет нодавлат олий таълим ташкилоти ҳисобланади ҳамда ўз фаолиятини Ўзбекистоннинг таълим соҳасидаги қонунчилик ҳужжатлари асосида амалга оширади.