Аи-80 бензинидан воз кечилди. Аи-92 ёқилғисини етказиб бероламизми?

Ўзбекистон қиш мавсумида ёқилғига бўлган талабни қоплаш мақсадида қўшимча чоралар кўрмоқда. Газ тўлдириш шохобчалари фаолиятига қўйилган чекловлар ва истеъмолнинг ортиши шароитида мамлакат автомобиль бензини, дизель ёқилғиси ва авиакеросин билан барқарор таъминлашни кучайтирмоқда. Бу ҳақда 11 декабрь куни Қонунчилик палатаси йиғилишида энергетика вазири Жўрабек Мирзамаҳмудов маълум қилди.

Вазирнинг таъкидлашича, қишки даврда ёқилғи таъминоти узлуксиз бўлиши учун ишлаб чиқариш va импорт ҳажмлари қайта кўриб чиқилган.

Дизель ёқилғисига талаб

Маълум қилинишича, дизель ёқилғисига бўлган умумий талаб 776 минг тоннага етиши кутилмоқда. Ушбу талабни қондириш учун жами 740 минг тонна дизель етказиб бериш режалаштирилган. Жумладан:

• 317 минг тонна — «Ўзбекнефтгаз» томонидан;
• 196 минг тонна — Saneg компанияси томонидан;
• 227 минг тонна — импорт ҳисобига.

Авиакеросинга эҳтиёж

Туризм va авиақатновлар ҳажмининг ошиши сабаб авиакеросинга бўлган талаб ҳам ортиб бормоқда. Вазирнинг сўзларига кўра, 223 минг тонна авиация керосинига бўлган эҳтиёжни қондириш учун 168 минг тоннаси мамлакатда ишлаб чиқарилади, 74 минг тоннаси эса импорт қилинади.

Аи-80 ўрнига Аи-92

Эслатиб ўтамиз, Аи-80 маркали бензин ишлаб чиқариш 2024 йил 1 сентябрдан тўхтатилган, 1 декабрдан эса сотувдан чиқарилган. Ушбу марканинг ўрнини қоплаш учун юқори октанли бензин ишлаб чиқариш кўпайтирилган.

«Аи-92 вa ундан юқори бензин ишлаб чиқариш ҳажмини ойига 80 минг тоннадан 100 минг тоннагача оширдик. Шу билан бирга, захира ҳам шакллантирилди», — деди вазир.

Маълумотларга кўра, давлат газ захирасидан ташқари, «Ўзбекнефтгаз» ҳозирда қишки эҳтиёж учун 85 минг тонна бензин захирасига эга.

Импорт кўрсаткичлари

Божхона қўмитаси маълумотларига кўра, жорий йилнинг дастлабки 11 ойида нефть маҳсулотлари импорти 1,42 млрд долларга етган. Бу ўтган йилнинг шу даврига нисбатан 6 фоизга кўп. Жумладан:

• дизель импорти — 500 млн доллар (+70%);
• бензин импорти — 441,7 млн доллар (+14,3%).

Дизель ёқилғисининг физик ҳажми қарийб 1,9 бараварга ошиб, 365,2 минг тоннадaн 679,5 минг тоннага етган. Бензин импорти эса 12,6 фоизга ўсиб, 662,4 млн литрдан 746,1 млн литргача кўпайган.

Шунингдек, Ўзбекистон авиация керосини импортини 2,6 бараварга ошириб, 28 минг тоннадан 74,1 минг тоннага етказган. Қиймат жиҳатидан бу кўрсаткич 21,4 млн доллардан 65,8 млн долларгача ўсган.