Ai-80 benzinidan voz kechildi. Ai-92 yoqilgʻisini yetkazib berolamizmi?

Oʻzbekiston qish mavsumida yoqilgʻiga boʻlgan talabni qoplash maqsadida qoʻshimcha choralar koʻrmoqda. Gaz toʻldirish shoxobchalari faoliyatiga qoʻyilgan cheklovlar va isteʼmolning ortishi sharoitida mamlakat avtomobil benzini, dizel yoqilgʻisi va aviakerosin bilan barqaror taʼminlashni kuchaytirmoqda. Bu haqda 11 dekabr kuni Qonunchilik palatasi yigʻilishida energetika vaziri Joʻrabek Mirzamahmudov maʼlum qildi.

Vazirning taʼkidlashicha, qishki davrda yoqilgʻi taʼminoti uzluksiz boʻlishi uchun ishlab chiqarish va import hajmlari qayta koʻrib chiqilgan.

Dizel yoqilgʻisiga talab

Maʼlum qilinishicha, dizel yoqilgʻisiga boʻlgan umumiy talab 776 ming tonnaga yetishi kutilmoqda. Ushbu talabni qondirish uchun jami 740 ming tonna dizel yetkazib berish rejalashtirilgan. Jumladan:

• 317 ming tonna — «Oʻzbekneftgaz» tomonidan;
• 196 ming tonna — Saneg kompaniyasi tomonidan;
• 227 ming tonna — import hisobiga.

Aviakerosinga ehtiyoj

Turizm va aviaqatnovlar hajmining oshishi sabab aviakerosinga boʻlgan talab ham ortib bormoqda. Vazirning soʻzlariga koʻra, 223 ming tonna aviatsiya kerosiniga boʻlgan ehtiyojni qondirish uchun 168 ming tonnasi mamlakatda ishlab chiqariladi, 74 ming tonnasi esa import qilinadi.

Ai-80 oʻrniga Ai-92

Eslatib oʻtamiz, Ai-80 markali benzin ishlab chiqarish 2024 yil 1 sentabrdan toʻxtatilgan, 1 dekabrdan esa sotuvdan chiqarilgan. Ushbu markaning oʻrnini qoplash uchun yuqori oktanli benzin ishlab chiqarish koʻpaytirilgan.

«Ai-92 va undan yuqori benzin ishlab chiqarish hajmini oyiga 80 ming tonnadan 100 ming tonnagacha oshirdik. Shu bilan birga, zaxira ham shakllantirildi», — dedi vazir.

Maʼlumotlarga koʻra, davlat gaz zaxirasidan tashqari, «Oʻzbekneftgaz» hozirda qishki ehtiyoj uchun 85 ming tonna benzin zaxirasiga ega.

Import koʻrsatkichlari

Bojxona qoʻmitasi maʼlumotlariga koʻra, joriy yilning dastlabki 11 oyida neft mahsulotlari importi 1,42 mlrd dollarga yetgan. Bu oʻtgan yilning shu davriga nisbatan 6 foizga koʻp. Jumladan:

• dizel importi — 500 mln dollar (+70%);
• benzin importi — 441,7 mln dollar (+14,3%).

Dizel yoqilgʻisining fizik hajmi qariyb 1,9 baravarga oshib, 365,2 ming tonnadan 679,5 ming tonnaga yetgan. Benzin importi esa 12,6 foizga oʻsib, 662,4 mln litrdan 746,1 mln litrgacha koʻpaygan.

Shuningdek, Oʻzbekiston aviatsiya kerosini importini 2,6 baravarga oshirib, 28 ming tonnadan 74,1 ming tonnaga yetkazgan. Qiymat jihatidan bu koʻrsatkich 21,4 mln dollardan 65,8 mln dollargacha oʻsgan.