Автокредит, субсидия ва чегирмалар: электромобиллар қўллаб-қувватланади

Бу 16 февраль куни тасдиқланган 2026 йилги давлат дастурида назарда тутилган бўлиб, электромобиль харидорлари, қувватлаш инфратузилмаси билан шуғулланувчи тадбиркорлар ҳамда электромобилда фаолият юритаётган такси ҳайдовчиларини қамраб олади.

Имтиёзли автокредитлар

Электромобиллар оммабоплигини ошириш мақсадида имтиёзли автокредитлаш механизми жорий этилади. Унга кўра, электромобиль сотиб олиш учун кредит ставкалари йиллик 16 фоизгача туширилади. Белгиланган меъёрдан юқори қисми давлат бюджети ҳисобидан қоплаб берилади.

Ҳозирги вақтда автокредитлар бўйича ўртача ставка 23 фоизни ташкил этмоқда. Дастлабки босқичда 15 мингта электромобиль харидини молиялаштириш режалаштирилган.

Қувватлаш инфратузилмаси кенгайтиради

2025 йил 1 май ҳолатига кўра, мамлакатда 1399 та қувватлаш станцияси мавжуд. Уларнинг сони 4000 тага етказилади.

Бизнесни қўллаб-қувватлаш мақсадида:

• 1 кВт/соат учун 300 сўмдан ортиқ бўлган электр тариф қисми давлат томонидан субсидия қилинади (амалда тарифлар 1800–2200 сўм атрофида);
• қувватлаш станциялари учун йиллик 10 фоизли мақсадли кредитлар ажратилади;

• инфратузилма учун ер участкалари аукционга бозор нархидан икки баравар паст бошланғич қийматда чиқарилади.

   

Электромобиль таксичилар учун имтиёзлар

Электромобилда такси хизмати кўрсатувчи фуқаролар учун махсус енгилликлар жорий этилади:

• ижтимоий солиқ бўйича 10 фоизгача чегирма;
• давлатга қарашли пулли автотураргоҳларда (аэропорт ва вокзалларда) дастлабки 30 дақиқа бепул фойдаланиш;
• қоидабузарлик ва ЙТҲсиз 1 млн км масофа босиб ўтган ҳайдовчиларга “Табиат ҳимоячиси” кўкрак нишони берилади.

Дастурга кўра, электромобилда фаолият юритувчи таксичилар сони 300 минг нафарга етказилади. Ҳозирда таксопарклардаги электромобиллар улуши 1,9 фоизни (12,1 мингта) ташкил этади.

Тизимли ёндашув масаласи

Мазкур чора-тадбирлар амалда самара бериши учун ижро ва назорат механизмлари шаффоф ишлаши муҳим. Инфратузилмани кенгайтириш, субсидия ва имтиёзли кредитларни ажратиш каби жараёнлар бир нечта босқич ва масъул идораларни қамраб олади.

Шу боис бундай йирик дастур доирасида юзага келиши мумкин бўлган муаммоларни фақат қуйи бўғинга юклаш тўғри эмас — масъул раҳбарлар ҳам жараёндан бехабар бўлиши амалда қийин. Дастур ижросида очиқлик ва жамоатчилик назорати таъминланиши унинг самарадорлигини белгилайди.