Avtokredit, subsidiya va chegirmalar: elektromobillar qoʻllab-quvvatlanadi

Bu 16 fevral kuni tasdiqlangan 2026 yilgi davlat dasturida nazarda tutilgan boʻlib, elektromobil xaridorlari, quvvatlash infratuzilmasi bilan shugʻullanuvchi tadbirkorlar hamda elektromobilda faoliyat yuritayotgan taksi haydovchilarini qamrab oladi.

Imtiyozli avtokreditlar

Elektromobillar ommabopligini oshirish maqsadida imtiyozli avtokreditlash mexanizmi joriy etiladi. Unga koʻra, elektromobil sotib olish uchun kredit stavkalari yillik 16 foizgacha tushiriladi. Belgilangan meʼyordan yuqori qismi davlat byudjeti hisobidan qoplab beriladi.

Hozirgi vaqtda avtokreditlar boʻyicha oʻrtacha stavka 23 foizni tashkil etmoqda. Dastlabki bosqichda 15 mingta elektromobil xaridini moliyalashtirish rejalashtirilgan.

Quvvatlash infratuzilmasi kengaytiradi

2025 yil 1 may holatiga koʻra, mamlakatda 1399 ta quvvatlash stansiyasi mavjud. Ularning soni 4000 taga yetkaziladi.

Biznesni qoʻllab-quvvatlash maqsadida:

• 1 kVt/soat uchun 300 soʻmdan ortiq boʻlgan elektr tarif qismi davlat tomonidan subsidiya qilinadi (amalda tariflar 1800–2200 soʻm atrofida);
• quvvatlash stansiyalari uchun yillik 10 foizli maqsadli kreditlar ajratiladi;

• infratuzilma uchun yer uchastkalari auksionga bozor narxidan ikki baravar past boshlangʻich qiymatda chiqariladi.

   

Elektromobil taksichilar uchun imtiyozlar

Elektromobilda taksi xizmati koʻrsatuvchi fuqarolar uchun maxsus yengilliklar joriy etiladi:

• ijtimoiy soliq boʻyicha 10 foizgacha chegirma;
• davlatga qarashli pulli avtoturargohlarda (aeroport va vokzallarda) dastlabki 30 daqiqa bepul foydalanish;
• qoidabuzarlik va YTHsiz 1 mln km masofa bosib oʻtgan haydovchilarga “Tabiat himoyachisi” koʻkrak nishoni beriladi.

Dasturga koʻra, elektromobilda faoliyat yurituvchi taksichilar soni 300 ming nafarga yetkaziladi. Hozirda taksoparklardagi elektromobillar ulushi 1,9 foizni (12,1 mingta) tashkil etadi.

Tizimli yondashuv masalasi

Mazkur chora-tadbirlar amalda samara berishi uchun ijro va nazorat mexanizmlari shaffof ishlashi muhim. Infratuzilmani kengaytirish, subsidiya va imtiyozli kreditlarni ajratish kabi jarayonlar bir nechta bosqich va masʼul idoralarni qamrab oladi.

Shu bois bunday yirik dastur doirasida yuzaga kelishi mumkin boʻlgan muammolarni faqat quyi boʻgʻinga yuklash toʻgʻri emas — masʼul rahbarlar ham jarayondan bexabar boʻlishi amalda qiyin. Dastur ijrosida ochiqlik va jamoatchilik nazorati taʼminlanishi uning samaradorligini belgilaydi.