Банк карталарида йирик пул айланмалари ва болалар ҳисобварақлари назорати кучайтирилди

Янги тартибда банк карталари, электрон ҳамёнлар, вояга етмаганлар ҳисобварақлари ва айрим йирик пул ўтказмалари бўйича назорат мезонлари янгиланди.

Энг муҳим ўзгаришлардан бири  16 ёшга тўлмаган шахсларнинг ҳисобварақлари бўйича янги мезон жорий этилгани.

Энди 16 ёшга тўлмаган шахснинг ҳисобварағига икки иш куни давомида 40 БҲМдан, яъни 16,48 млн сўмдан ортиқ маблағ кирим қилиниши, чиқим қилиниши ёки нақд ечиб олиниши гумонли операция мезонларидан бири ҳисобланади.

Картадан картага йирик ўтказмалар

30 кундан ошмаган даврда мижознинг банк картасидан мобил илова орқали бир ёки бир нечта банк картаси ёки электрон ҳамёнга жами 500 БҲМ – 206 млн сўм ва ундан ортиқ маблағ ўтказилиши шубҳали операция мезони ҳисобланади.

Шунингдек, 30 кун ичида мижознинг банк картасига бир ёки бир нечта карта ёки электрон ҳамёндан жами 1000 БҲМ – 412 млн сўм ва ундан ортиқ маблағ келиб тушиши ҳам шубҳали операция мезонига киради.

Бу икки мезон аввал ҳам мавжуд бўлган. Янги тартибда кўчмас мулк ва транспорт воситаларининг олди-сотдиси бўйича эскроу ҳисобварақлари орқали амалга оширилган операциялар бундан мустасно қилинди.

Айрим давлатлар билан пул ўтказмалари ҳам назоратда

Янги мезон кучайтирилган мониторинг остидаги давлатлар билан боғлиқ операцияларга ҳам тааллуқли.

30 кундан ошмаган даврда бундай давлатлардан мижоз ҳисобварағига жами 1000 БҲМ — 412 млн сўм ва ундан ортиқ маблағ келиб тушиши ёки мижоз ҳисобварағидан мазкур давлатларга шунча миқдорда маблағ ўтказилиши шубҳали операция мезонларидан бири ҳисобланади.

Мижозни текшириш чегараси пасайтирилди

Мижозни лозим даражада текшириш бўйича чегара ҳам ўзгарди.

Илгари банк ҳисобварағини очмасдан ёки ҳисобварақдан фойдаланмасдан амалга ошириладиган бир марталик операция 500 БҲМ – 206 млн сўмга тенг ёки ундан юқори бўлса, банк мижозни лозим даражада текшириши керак эди.

Энди ушбу чегара 175 млн сўм этиб белгиланди. Яъни мижозни лозим даражада текшириш бошланадиган чегара амалда 206 млн сўмдан 175 млн сўмга туширилди.

Муҳими, белгиланган миқдорга етиш операция автоматик равишда ноқонуний дегани эмас. Бу банкларнинг ички назорати учун белгиланган мезон бўлиб, бундай операциялар белгиланган қоидалар асосида қўшимча ўрганилиши мумкин.

Мазкур ўзгартишлар Марказий банк ҳамда Бош прокуратура ҳузуридаги Иқтисодий жиноятларга қарши курашиш департаменти қарори билан киритилган ва 9 августдан кучга кирган.