Ўзбекистонда автомобиль бозори ўсмоқда: электромобиллар савдоси 40 мингдан ошди

Бу ҳақда Иқтисодий тадқиқотлар ва ислоҳотлар маркази томонидан тақдим этилган бирламчи автомобиль бозори таҳлилида маълум қилинди.

Таҳлилга кўра, 2025 йил давомида маҳаллий ва импорт ишлаб чиқарилган янги енгил автомобиллар савдоси умумий ҳисобда 5,2 фоизга ошиб, қарийб 370 минг донани ташкил этган.

Ҳудудлар кесимидаги фаоллик

Автомобиль бозоридаги энг юқори ўсиш суръатлари Сирдарё вилоятида (45 фоиз) қайд этилди. Шунингдек, Тошкент вилояти (36 фоиз), Наманган вилояти (26 фоиз) ва Қашқадарё вилоятида (21 фоиз) ҳам савдо ҳажмлари сезиларли ошган.

Шу билан бирга, йил давомида Тошкент шаҳри, Навоий ва Хоразм вилоятларида янги енгил автомобиллар реализацияси ҳажми камайгани кузатилган.

Маҳаллий ва импорт автомобиллар улуши

2025 йилда маҳаллий ишлаб чиқарилган янги енгил автомобиллар савдоси 315 минг донанидан ошди. Хорижий ишлаб чиқарилган янги автомобиллар реализацияси эса тахминан 53,3 минг донани ташкил этган.

Электромобиллар бозорида Тошкент етакчи

Электромобиллар сегменти автомобиль бозори ўсишининг асосий драйверларидан бири бўлди. Ҳудудий таҳлилга кўра, янги электромобиллар сотувининг катта қисми Тошкент шаҳри ҳиссасига тўғри келади. Хусусан, пойтахтда 29 мингта янги электромобиль сотилган бўлиб, бу умумий ҳажмнинг 71 фоизини ташкил этади.

Кейинги ўринларда Самарқанд вилояти, Тошкент вилояти ҳамда Қашқадарё вилояти қайд этилган.