Oʻzbekistonda avtomobil bozori oʻsmoqda: elektromobillar savdosi 40 mingdan oshdi

Bu haqda Iqtisodiy tadqiqotlar va islohotlar markazi tomonidan taqdim etilgan birlamchi avtomobil bozori tahlilida maʼlum qilindi.

Tahlilga koʻra, 2025 yil davomida mahalliy va import ishlab chiqarilgan yangi yengil avtomobillar savdosi umumiy hisobda 5,2 foizga oshib, qariyb 370 ming donani tashkil etgan.

Hududlar kesimidagi faollik

Avtomobil bozoridagi eng yuqori oʻsish surʼatlari Sirdaryo viloyatida (45 foiz) qayd etildi. Shuningdek, Toshkent viloyati (36 foiz), Namangan viloyati (26 foiz) va Qashqadaryo viloyatida (21 foiz) ham savdo hajmlari sezilarli oshgan.

Shu bilan birga, yil davomida Toshkent shahri, Navoiy va Xorazm viloyatlarida yangi yengil avtomobillar realizatsiyasi hajmi kamaygani kuzatilgan.

Mahalliy va import avtomobillar ulushi

2025 yilda mahalliy ishlab chiqarilgan yangi yengil avtomobillar savdosi 315 ming donanidan oshdi. Xorijiy ishlab chiqarilgan yangi avtomobillar realizatsiyasi esa taxminan 53,3 ming donani tashkil etgan.

Elektromobillar bozorida Toshkent yetakchi

Elektromobillar segmenti avtomobil bozori oʻsishining asosiy drayverlaridan biri boʻldi. Hududiy tahlilga koʻra, yangi elektromobillar sotuvining katta qismi Toshkent shahri hissasiga toʻgʻri keladi. Xususan, poytaxtda 29 mingta yangi elektromobil sotilgan boʻlib, bu umumiy hajmning 71 foizini tashkil etadi.

Keyingi oʻrinlarda Samarqand viloyati, Toshkent viloyati hamda Qashqadaryo viloyati qayd etilgan.