Янги йил олдидан ёлғон чегирмаларга қарши назорат кучайтирилди

Қўмита маълумотига кўра, жорий йил давомида органга 48 мингдан ортиқ мурожаат келиб тушган бўлиб, уларнинг аксарияти товар ва хизматлар нархлари бўйича нотўғри маълумот берилгани билан боғлиқ.

Чакана савдо қоидаларига биноан сотувчи қуйидагиларга амал қилишга мажбур:

• чегирмани олдинги 30 кунлик энг паст нарх асосида белгилаш;
• чегирма миқдори, муддати ва шартларини аниқ кўрсатиш;
• агар товар сони чекланган бўлса, бу ҳақда олдиндан билдириш;
• истеъмолчи талаб қилганда, аввалги нарх ҳақидаги далилларни тақдим этиш;
• акция шартларини ўзгартирмаслик ва унинг ҳақиқий амал қилинишини таъминлаш.

Шунингдек, алкоголь, тамаки маҳсулотлари, БАДлар, дори воситалари ва энергетик ичимликлар бўйича чегирма ёки рағбатлантирувчи акциялар ўтказиш қонун билан тақиқланади.

Қўмита тадбиркорларни қонунчилик талабларига қатъий риоя қилишга чақирар экан, қоидалар бузилган тақдирда жавобгарлик ва жарималар қўлланишини эслатиб ўтди.