АҚШ 75 давлат фуқаролари учун виза беришни вақтинча тўхтатди

Бу ҳақда Fox News телеканали идоранинг ички ҳужжатига таяниб хабар берди.

Маълумотларга кўра, мазкур қарор бутун дунё бўйлаб фаолият юритаётган АҚШ консулликларига етказилган. Ҳужжатда амалдаги қонунчилик доирасида виза аризаларини рад этиш чораларини кучайтириш топширилган. Чеклов визаларни текшириш ва баҳолаш тартиби қайта кўриб чиқилгунга қадар амал қилади.

Янги талаблар қачон жорий этилиши ҳозирча маълум қилинмаган.

Fox News хабарига кўра, Давлат департаменти айниқса Сомали фуқароларига нисбатан алоҳида эътибор қаратган. Бунга Миннесота штатида фош этилган йирик фирибгарлик иши сабаб бўлган. Тергов давомида давлат томонидан ажратиладиган ижтимоий нафақаларни суиистеъмол қилиш ҳолатлари аниқланган. Ушбу иш доирасида сомалиликлар ёки Сомали келиб чиқишига эга АҚШ фуқаролари суд жавобгарлигига тортилган.

Эслатиб ўтамиз, АҚШ аввал ҳам виза тартибларини кучайтириш бўйича чоралар кўрган. Хусусан, 2025 йил ноябр ойида Давлат департаменти дипломатик ваколатхоналарга аризачиларни янада қатъий текшириш бўйича кўрсатма юборган эди. Унга кўра, номзодларнинг соғлиғи, ёши, инглиз тилини билиш даражаси ва молиявий аҳволи ҳисобга олинади.

Шунингдек, айрим ҳолларда кексалар, ортиқча вазнга эга шахслар ёки аввал давлатдан ижтимоий нафақа олган аризачиларга виза рад этилиши мумкин.

Давлат департаменти вакили Томми Пигготнинг таъкидлашича, АҚШ “мамлакат учун ижтимоий юк бўлиши мумкин бўлган” муҳожирларни қабул қилмаслик ҳуқуқидан фойдаланмоқда. Шу сабабли 75 давлатдан келувчи фуқаролар учун иммиграция жараёнлари қайта баҳолангунга қадар тўхтатилган.