AQSh 75 davlat fuqarolari uchun viza berishni vaqtincha toʻxtatdi

AQSh Davlat departamenti 75 davlat fuqarolari uchun viza berish jarayonini vaqtincha toʻxtatdi. Bu haqda Fox News telekanali idoraning ichki hujjatiga tayanib xabar berdi.

Maʼlumotlarga koʻra, mazkur qaror butun dunyo boʻylab faoliyat yuritayotgan AQSh konsulliklariga yetkazilgan. Hujjatda amaldagi qonunchilik doirasida viza arizalarini rad etish choralarini kuchaytirish topshirilgan. Cheklov vizalarni tekshirish va baholash tartibi qayta koʻrib chiqilgunga qadar amal qiladi.

Yangi talablar qachon joriy etilishi hozircha maʼlum qilinmagan.

Fox News xabariga koʻra, Davlat departamenti ayniqsa Somali fuqarolariga nisbatan alohida eʼtibor qaratgan. Bunga Minnesota shtatida fosh etilgan yirik firibgarlik ishi sabab boʻlgan. Terguv davomida davlat tomonidan ajratiladigan ijtimoiy nafaqalarni suiisteʼmol qilish holatlari aniqlangan. Ushbu ish doirasida somaliliklar yoki Somali kelib chiqishiga ega AQSh fuqarolari sud javobgarligiga tortilgan.

Eslatib oʻtamiz, AQSh avval ham viza tartiblarini kuchaytirish boʻyicha choralar koʻrgan. Xususan, 2025 yil noyabr oyida Davlat departamenti diplomatik vakolatxonalarga arizachilarni yanada qatʼiy tekshirish boʻyicha koʻrsatma yuborgan edi. Unga koʻra, nomzodlarning sogʻligʻi, yoshi, ingliz tilini bilish darajasi va moliyaviy ahvoli hisobga olinadi.

Shuningdek, ayrim hollarda keksalar, ortiqcha vaznga ega shaxslar yoki avval davlatdan ijtimoiy nafaqa olgan arizachilarga viza rad etilishi mumkin.

Davlat departamenti vakili Tommi Piggotning taʼkidlashicha, AQSh “mamlakat uchun ijtimoiy yuk boʻlishi mumkin boʻlgan” muhojirlarni qabul qilmaslik huquqidan foydalanmoqda. Shu sababli 75 davlatdan keluvchi fuqarolar uchun immigratsiya jarayonlari qayta baholangunga qadar toʻxtatilgan.