Атамбаев давлат мукофотларидан маҳрум қилинди

Президент администрацияси матбуот хизматига кўра, қарор 2025 йил 3 июнда Бишкек шаҳрининг Первомай туман суди чиқарган ҳукм ижросини таъминлаш мақсадида қабул қилинган. 

Фармон «Қирғизистон Республикасининг давлат мукофотлари, фахрий унвонлари ва мукофот пуллари тўғрисида»ги қонуннинг 27-моддаси 1, 2 ва 4-қисмлари ҳамда Конституциянинг 71-моддасига мувофиқ чиқарилган.

Фармонга асосан, Алмазбек Атамбаев қуйидаги давлат мукофотларидан маҳрум этилди:
— «Қирғизистон Республикаси Қаҳрамони» олий даражаси;
— II даражали «Манас» ордени;
— «Данакер» ордени;
— «Данк» медали.
Шунингдек, Атамбаевни давлат мукофотлари билан тақдирлаш тўғрисида 1999, 2007, 2011 ва 2017 йилларда қабул қилинган президент фармонларининг айрим бандлари бекор қилинди.

Бош прокуратура ҳузуридаги Суд ижрочилари хизматига кўрсатилган давлат мукофотлари ва уларга тегишли ҳужжатларни белгиланган тартибда олиб қўйиб, кейинчалик давлат мукофотлари фондига топшириш вазифаси юклатилди. Фармон имзоланган кундан эътиборан кучга киради.

Маълумот учун, Қирғизистон куч тузилмалари Алмазбек Атамбаевни 2019 йил 8 августда Бишкекдан 20 километр узоқликда жойлашган Қўй-Тош қишлоғидаги қароргоҳида қўлга олган. 2025 йил июнь ойида суд уни сиртдан 11 йил 6 ойга озодликдан маҳрум қилган.