Бразилияда аёл 55 йил маошсиз меҳнатга мажбурлангани аниқланди

Қутқарув операцияси Бразилия Меҳнат инспекцияси, Меҳнат прокуратураси, Федерал полиция ва инсон ҳуқуқлари бўйича мутахассислар иштирокида ўтказилди.

Терговга кўра, аёл 1971 йилда, етти ёшида мазкур оилага келган. У дастлаб кекса эр-хотинга, кейин эса уларнинг фарзандлари ва набираларига хизмат қилган. Уй тозалаш, овқат тайёрлаш ва болаларга қараш унинг кундалик вазифалари бўлган. Иш куни эса ҳар куни тахминан соат 04:30 да бошланган.

Ҳуқуқ-тартибот идоралари маълум қилишича, аёл ўқиш ва ёзишни билмаган, шахсий банк ҳисоб рақамига эга бўлмаган ҳамда ташқи дунё билан деярли алоқа қилмаган. У турар жой, озиқ-овқат ва кийим-кечакни меҳнати учун ҳақ сифатида қабул қилиб келган.

Терговчилар яна бир ҳолатни ҳам ўрганмоқда. Маълум бўлишича, аёл давлатнинг ижтимоий нафақасини олган, аммо бу маблағлар иш берувчилар томонидан назорат қилинган ва ечиб олинган бўлиши мумкин.

Меҳнат прокуратураси билан эришилган келишувга кўра, иш берувчилар аёлга тахминан 150 минг реал қийматидаги мебелли квартира, 50 минг реал миқдорида компенсация тақдим этиш ҳамда пенсияга чиққанга қадар ижтимоий бадалларни расмийлаштиришга розилик билдирган.

Бироқ меҳнат инспекцияси ҳисоб-китобига кўра, аёлга тўланмаган иш ҳақи ва бошқа меҳнат тўловлари 1,5 миллион реалдан (қарийб 290 минг доллардан) ортиқ бўлиши мумкин.

Иш берувчи оила эса эксплуатация ҳақидаги айбловларни рад этиб, муносабатлар «ғамхўрлик ва меҳр-оқибат» асосида шаклланганини билдирган.

Расман озод этилганига қарамай, аёл ҳозирча ўша уйда қолмоқда. Мутахассислар бу ҳолатни унинг кўп йиллик психологик ва ижтимоий қарамлиги билан изоҳламоқда. Ҳозирда унинг қариндошлари қидирилмоқда ва мустақил ҳаётга мослаштириш бўйича ишлар олиб борилмоқда.