Ўтган йили 124 нафардан ортиқ экология ҳимоячиси ўлдирилган

Global Witness ташкилотининг янги ҳисоботига кўра, 2025-йилда ўрмонлар, ерлар ва сув ҳавзаларини ҳимоя қилган камида 124 киши ҳаётдан кўз юмган. Ҳисобот муаллифлари бой давлатларнинг ташқи ёрдамни кескин қисқартириши инсон ҳуқуқлари ташкилотларини заифлаштирганини, бу эса экология ҳимоячиларини янада ҳимоясиз қолдирганини таъкидлашади.

Global Witnessнинг катта кампания вакили Juliana Vélez Echeverri фикрича, АҚШдан келадиган ёрдам кескин камайгани сабаб Колумбияда инсон ҳуқуқларини ҳимоя қилувчи лойиҳалар жиддий зарар кўрмоқда.

Қотилликларнинг 85 фоизи Лотин Америкасида қайд этилган. Энг кўп ҳолат Колумбияда — 39 та, Бразилияда эса 26 та. Ҳалок бўлганларнинг қарийб учдан бири туб маҳаллий аҳоли вакиллари бўлган. Ер билан боғлиқ низолар эса ўлимларнинг ярмидан кўпроғига сабаб бўлган.

Колумбияда кокаин ишлаб чиқариш учун ишлатиладиган кока ўсимлиги етиштирилиши кескин ошган, бу эса ер устидан низоларни кучайтириб, ҳимоячиларни гиёҳванд моддалар сотувчилари нишонига айлантирмоқда. Бразилияда эса ўлимлар асосан Амазония чеккаларида қайд этилган, бу ўрмонларнинг кесилиши билан боғлиқ.

Филиппин Осиёдаги энг хавфли давлат бўлиб қолмоқда. Ўтган йилнинг ўзида 12 нафар эко ҳимоячи ўлдирилган, мамлакатда эко фаолларга босим кундан-кунга кучайиб бормоқда. Бошқа минтақаларда ўлдирилиш ҳолатлари нисбатан кам бўлса-да, ҳисоботда Индонезиянинг фаоллик ҳаракатларини жиноий жавобгарликка тортиш йўлидан бораётгани, шунингдек Россия ва Марказий Осиё давлатларидаги режимларнинг сиёсий рақибларни интернет орқали обрўсизлантириш кампаниялари орқали синдиришга уринаётгани қайд этилган.