"Crocus City Hall" да терактни уюштиришда айбланаётганлар терактдан сўнг ваъда қилинган мукофотни олиш учун Киевга йўл олганликларини тан олишди — Россия Тергов қўмитаси

Аввалроқ ижтимоий тармоқларда терактда айбланаётганларнинг очиқ-ойдин қийноққа солингани акс этган фотосуратлар ва видеолар пайдо бўлган эди. Суд теракт иши бўйича жараёнларни ёпиқ шаклда ўтказишга қарор қилган.

Россия расмийлари ҳеч қандай аниқ далил келтирмасдан, терактда Украинанинг "қўли" борлигини қатъий таъкидламоқда. Шу билан бирга, ҳужум учун жавобгарликни ИШИДнинг "Вилоят Хуросон" бўлими расман ўз зиммасига олганлиги ҳақида эълон қилган.

Кеча теракт иши бўйича тўққизинчи айбланувчи ҳам ҳибсга олинди.

“Назримад Лутфуллоийга нисбатан 22-майга қадар қамоққа олиш тарзидаги эҳтиёт чораси тайинлансин”, — дея суд қароридан иқтибос келтиради ТАСС.

Россия матбуоти хабар беришича, асли тожикистонлик 24 ёшли Назримад Лутфуллои Москвадаги “Шчелковская” метро бекати яқинидаги ётоқхонада яшаган. Хотини ҳам, фарзанди ҳам, иши ҳам йўқ, лекин олий маълумотли.