Эронда мотам даврида нималар ўзгаради?

Мамлакатда олти кунлик давлат мотами эълон қилинган бўлиб, унда дунёнинг турли давлатларидан расмий делегациялар иштирок этмоқда.

Маросимлар 4 июль куни Теҳрон шаҳридаги «Мусалло» мажмуасида бошланади. 5 июль куни жаноза намози ўқилиб, пойтахт кўчаларида оммавий мотам юриши ўтказилади.

Хотира тадбирлари Қум ва Машҳад шаҳарларида, шунингдек, шиалар учун муқаддас саналган Ироқнинг Нажаф ва Карбало шаҳарларида ҳам давом этади. Якуний дафн маросими 9 июль куни Машҳад шаҳрида бўлиб ўтади.

Маросимларда Ўзбекистон делегацияси ҳам иштирок этади. Делегацияга Олий Мажлис Қонунчилик палатаси Спикери Нуриддин Исмоилов раҳбарлик қилмоқда.

Мотам нима?

Мотам — давлат ёки жамият учун муҳим аҳамиятга эга шахснинг вафоти ёки йирик фожиа муносабати билан эълон қилинадиган расмий қайғу давридир.

Унинг асосий мақсади марҳум хотирасига ҳурмат кўрсатиш, ҳамдардлик билдириш ва жамият бирдамлигини намоён этишдан иборат.

Давлат мотами даврида нималар ўзгаради?

Кўплаб давлатларда расмий мотам эълон қилинганда:

• давлат байроқлари ярим устунга туширилади;
• расмий жаноза ва хотира маросимлари ўтказилади;
• телевидение ва радиода кўнгилочар дастурлар қисқартирилади ёки вақтинча тўхтатилади;
• концертлар, байрам тадбирлари ва оммавий томошалар бекор қилиниши ёки бошқа санага кўчирилиши мумкин;
• айрим ҳолларда давлат идоралари, таълим муассасалари ва бошқа ташкилотлар иш тартибига вақтинчалик ўзгартишлар киритилади.

Эронда мотам қандай ўтади?

Эронда давлат мотами диний анъаналар билан чамбарчас боғлиқ.

Олий раҳнамо вафот этганда мамлакат бўйлаб оммавий мотам маросимлари ўтказилади, миллионлаб фуқаролар жаноза ва мотам юришларида қатнашади.

Масжидлар ва ҳусайнияларда Қуръон тиловат қилинади, марҳум ҳаққига дуолар ўқилади ва хотира йиғинлари ташкил этилади.

Шу билан бирга, хавфсизлик чоралари кучайтирилади, транспорт ва логистика тизими махсус тартибда ишлайди.

Бироқ давлат мотами мамлакат ҳаётининг тўлиқ тўхтаб қолишини англатмайди. Давлат идоралари ва иқтисодий фаолият одатдагидек давом этади, аммо байрамона тадбирлар чекланади ва жамоатчилик марҳум хотирасини ёд этишга чақирилади.

Мафтуна Бахтиёрова