Эрон АҚШ ультиматумини рад этди

Эрон Ташқи ишлар вазирлиги расмий вакили Исмоил Бақоийнинг айтишича, ўзаро англашув меморандумида 60 кунлик давр ҳақида сўз борган, аммо бу муддат фақат санкцияларни бекор қилиш ва ядровий масала бўйича музокараларга тааллуқли бўлган.

«Меморандум матнида “60 кунлик сўнгги муддат” деган қоида йўқ. Эрон Ислом Республикаси ҳеч қачон ўз сиёсатини босим, ультиматум ёки вақт билан боғлиқ муддатлар асосида шакллантирмайди», — деди Бақоий.

Унинг таъкидлашича, агар белгиланган даврда томонлар натижага эриша олмаганида, музокаралар муддати узайтирилиши мумкин эди.

Теҳроннинг билдиришича, музокара жараёни АҚШ томонидан 18 июнь куни имзоланган меморандум шартлари бузилганидан сўнг издан чиққан.

«Музокаралар умуман бошланмади. Шунинг учун 60 кунлик муддат масаласи ўз аҳамиятини бутунлай йўқотди», — деди Эрон ТИВ вакили.

Шу тариқа, Теҳрон АҚШ билан келишувни ультиматум эмас, балки санкциялар ва ядровий масалани муҳокама қилиш учун белгиланган вақт оралиғи сифатида баҳоламоқда.